ឥណ្ឌា ប្រើវិធីសាស្រ្តចម្លែក ដេញជើងអ្នកមិនព្រមចាក់វ៉ាក់សាំងកូវីដ

យុទ្ធនាការចាក់វ៉ាក់សាំងកូវីដនៅក្នុងស្រុក Niwari នៃរដ្ឋ Madhya Pradesh បានជំរុញឲ្យប៉ូលិសចេញត្រួតពិនិត្យនៅតាមដងផ្លូវ ហើយឲ្យអ្នកដែលមិនចាក់វ៉ាក់សាំង ត្រូវពាក់ស្លាកមានសញ្ញាក្បាលខ្មោចនិងសារថា “នៅឲ្យឆ្ងាយពីខ្ញុំ ខ្ញុំមិនទាន់ចាក់វ៉ាក់សាំងទេ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកដែលត្រូវបានប្រគល់ស្លាកទាំងនេះ ត្រូវបានគេជំរុញឲ្យអានសារនេះឲ្យឮៗ ហើយត្រូវស្បថថា ពួកគេនឹងទៅចាក់វ៉ាក់សាំងក្នុងរយៈពេលពីរថ្ងៃទៀត។

ចំណែកឯអ្នកដែលបានចាក់វ៉ាក់សាំងរួច ត្រូវបានគេផ្តល់ស្លាកសញ្ញាដែលមានពណ៌ទង់ជាតិនិងសារថា “ខ្ញុំជាអ្នកស្នេហាជាតិពិតប្រាកដ ព្រោះខ្ញុំបានចាក់វ៉ាក់សាំងរួចហើយ”។

នៅពេលត្រូវបានសួរអំពីវិធានការបែបនេះ ដែលត្រូវបានធ្វើឡើងស្របពេលរដ្ឋនានាកំពុងប្រឈមនឹងកង្វះខាតវ៉ាក់សាំង, លោក Niwari SP Alok Kumar Singh បាននិយាយថាការធ្វើបែបនេះ គឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមជាច្រើន ហើយវាគ្រាន់តែជានិមិត្តសញ្ញាដែលមានគោលបំណងបង្កើតការយល់ដឹងប៉ុណ្ណោះ”។

លោកនិយាយថា វិធីសាស្រ្តបែបនេះ គឺដើម្បីជម្នះភាពស្ទាក់ស្ទើរទៅចាក់វ៉ាក់សាំង ជាពិសេសនៅតាមភូមិ។

គួរបញ្ជាក់ថា នៅ​ថ្ងៃ​ព្រហស្បតិ៍ ទី​១០ ខែ​មិថុនា​នេះ ប្រទេស​ឥណ្ឌា​បាន​បង្ហាញអំពី​តួលេខ​នៃអ្នកស្លាប់​​ដោយ​សារជំងឺ ​​កូវីដ​-១៩​ក្នុង​រយៈ​ពេល​២៤​ម៉ោង​ចុង​ក្រោយ​ ​ដល់ទៅ ៦,១៤៨​នាក់ឯណោះ។

បូក​​បញ្ចូល​ទាំង​ករណី​មរណភាព​​​ចុង​ក្រោយ​នេះ ​​បាន​ធ្វើ​ឲ្យ​តួលេខ​ស្លាប់​សរុប​នៅ​ប្រទេស​ឥណ្ឌា​ ​មាន​ចំនួន ៣៥៩,៦៧៦​នាក់។

ចំណែក​ករណី​ឆ្លង​ថ្មី ​ក្នុង​រយៈ​ពេល​២៤​ម៉ោង​វិញ​មាន​ចំនួន ៩៤,០៥២ករណី ​​ដែល​​ធ្វើ​ឲ្យចំនួន​ឆ្លង​សរុប​នៅ​ប្រទេស​ឥណ្ឌា​មាន​ ២៩.២​លាន​នាក់៕

ប្រែសម្រួល៖ Vann Vann

ប្រភព៖​ Indian Express

ចុចអាន៖ ថ្ងៃ នេះ ឥណ្ឌា ស្លាប់ ច្រើន ណាស់ ដល់ ៦១៤៨ នាក់ ដោយ សារ កូវីដ