ប្រទេសមួយនៅមជ្ឈិមបូព៌ាអះអាងថា វ៉ាក់សាំងរុស្ស៊ី Sputnik V មានប្រសិទ្ធភាពការពារកូវីដ ៩៤ ភាគរយ

ក្រសួងសុខាភិបាលប្រទេសបារ៉ែន បានប្រកាសកាលពីថ្ងៃព្រហស្បតិ៍ថា វ៉ាក់សាំង Sputnik V របស់រុស្ស៊ី បានបង្ហាញពីប្រសិទ្ធភាពការពារកូវីដ ចំនួន ៩៤.៣ ភាគរយ ហើយមានទម្រង់សុវត្ថិភាពខ្ពស់ នៅប្រទេសបារ៉ែន ។

ក្រសួងបានធ្វើការសិក្សាស្រាវជ្រាវនេះ ដែលរួមមានប្រជាពលរដ្ឋជាង ៥,០០០ នាក់នៅប្រទេសបារ៉ែន ចន្លោះពីខែកុម្ភៈ ឆ្នាំ ២០២១ ដល់ខែមេសា ឆ្នាំ ២០២១ ស្របតាមគោលការណ៍ណែនាំ របស់អង្គការសុខភាពពិភពលោក (WHO) ដើម្បីសាកល្បងប្រសិទ្ធភាព នៃវ៉ាក់សាំង Sputnik V ។

ទន្ទឹមនោះ CEO នៃមូលនិធិវិនិយោគផ្ទាល់រុស្ស៊ី (RDIF) លោក Kirill Dmitriev បានពន្យល់ថា ប្រសិទ្ធភាពនៃវ៉ាក់សាំងនេះ បានឈានដល់ ៩៤.៣ ភាគរយ ក្នុងរយៈពេល ២ សប្តាហ៍ បន្ទាប់ពីអ្នកចូលរួមបានចាក់ដូសទី ២ ។

លទ្ធផលនេះក៏បានបង្ហាញផងដែរថា ៩៩ ភាគរយនៃអ្នកដែលចាក់វ៉ាក់សាំងនេះហើយ ហើយឆ្លងវីរុសនេះរយៈពេល ២ សប្ដាហ៍ បន្ទាប់ពីចាក់ដូសទី ២ បង្ហាញរោគសញ្ញាស្រាល នេះហើយជាប្រសិទ្ធភាព នៃការចាក់វ៉ាក់សាំង Sputnik V ខណៈវ៉ាក់សាំងនេះ ក៏មានសុវត្ថិភាពផងដែរ ចំពោះការការពារការស្លាប់ ពីជំងឺកូវីដ ១៩ ។

គួរបញ្ជាក់ថា ប្រទេសបារ៉ែន បានអនុញ្ញាតវ៉ាក់សាំង Sputnik V របស់រុស្ស៊ី សម្រាប់ការប្រើប្រាស់ជាបន្ទាន់ កាលពីខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ រុស្ស៊ី ពិចារណាផ្ទេរបច្ចេកវិទ្យាផលិតវ៉ាក់សាំង Sputnik V ទៅ វៀតណាម