ប្រេស៊ីល គ្រោងឲ្យអ្នកធ្លាប់កើតជំងឺកូវីដ-១៩ មិនចាំបាច់ពាក់ម៉ាស់ក៏បាន

ប្រធានាធិបតីប្រេស៊ីលលោក Jair Bolsonaro បាននិយាយកាលពីថ្ងៃព្រហស្បតិ៍ថា រដ្ឋមន្រ្តីក្រសួងសុខាភិបាលកំពុងរៀបចំវិធានការមួយ ដែលមិនតម្រូវឲ្យពាក់ម៉ាស់ទៀតទេ ចំពោះមនុស្សចាក់វ៉ាក់សាំងរួច ឬអ្នកឆ្លងជំងឺកូវីដ-១៩ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bolsonaro ដែលបានប្រឆាំងវិធានការបិទខ្ទប់និងគម្លាតសង្គម បាននិយាយនៅក្នុងសុន្ទរកថាមួយថា ការធ្វើចត្តាឡីស័ក គួរតែអនុវត្តសម្រាប់តែអ្នកឆ្លងជំងឺបានហើយ។

រដ្ឋមន្រ្តីក្រសួងសុខាភិបាល លោក Marcelo Queiroga បាននិយាយថា លោក Bolsonaro បានស្នើឲ្យគាត់សិក្សាលើការប្រើប្រាស់ម៉ាស់នៅប្រទេស ប្រេស៊ីល។

ទោះបីជាយ៉ាងណាក៏ដោយ ក្នុងសប្តាហ៍នេះ លោករដ្ឋមន្ត្រីបានផ្តល់សក្ខីកម្ម នៅចំពោះមុខគណៈកម្មការស៊ើបអង្កេតរបស់ព្រឹទ្ធសភាថា ម៉ាស់គួរតែត្រូវបានប្រើដើម្បីការពារការឆ្លងរោគ។

គាត់ក៏បានជំទាស់ជាមួយលោក Bolsonaro ពាក់ព័ន្ធការប្រើប្រាស់ថ្នាំ Hydroxychloroquine ផងដែរ ដោយនិយាយថា មិនមានភស្តុតាងណាមួយបង្ហាញថា ថ្នាំគ្រុនចាញ់មួយនេះ មានប្រសិទ្ធភាពក្នុងការព្យាបាលអ្នកជំងឺ កូវីដ-១៩ នោះទេ។

ប្រជាជនប្រេស៊ីលជាង ៤៨០,០០០ នាក់បានស្លាប់ដោយសារជំងឺកូវីដ-១៩ ដែលជាចំនួនអ្នកស្លាប់ដ៏អាក្រក់បំផុតលំដាប់ទី ២ បន្ទាប់ពីសហរដ្ឋអាមេរិក។

ទន្ទឹមនឹងនេះ កម្មវិធីចាក់វ៉ាក់សាំងរបស់ប្រទេសប្រេស៊ីលមានភាពយឺតយ៉ាវ ដោយយោងតាមទិន្នន័យរបស់ក្រសួងសុខាភិបាលបានបង្ហាញថា ប្រជាជនប្រេស៊ីលត្រឹមតែ​២៣,៦ភាគរយប៉ុណ្ណោះដែលទទួលបានការចាក់ដូសទី១ ហើយមានតែ ១០,២ភាគរយ ប៉ុណ្ណោះដែលបានទទួលដូសទី២៕

ប្រែសម្រួល៖ Vann Vann

ប្រភព៖ Reuters

ចុចអាន៖ ចាក់វ៉ាក់សាំងយឺតយ៉ាវនិងកង្វះវិធានការទប់ស្កាត់ ប្រេស៊ីល ត្រៀមខ្លួនទទួលកូវីដ រលកទី៣