ព័ត៌មានអន្ដរជាតិ

មិនទាន់ធូរទេ ម៉ាឡេស៊ីសម្រេចបន្តបំរាមទូទាំងប្រទេស២សប្តាហ៍ទៀត

បានផុស

៤ years មុន

នៅ

ថ្ងៃសៅរ៍ ១២ មិថុនា ២០២១

ដោយ

ប្រទេសម៉ាឡេស៊ីបានសម្រេចដាក់បំរាមទូទាំងប្រទេសរយៈពេល២សប្តាហ៍ទៀតរហូតដល់ថ្ងៃទី២៨ ខែមិថុនា ដើម្បីទប់ស្កាត់ជំងឺកូវីដ-១៩ដែលកំពុងវាយប្រហារខ្លាំងនៅប្រទេសអាស៊ានមួយនេះ។

រដ្ឋាភិបាលម៉ាឡេស៊ីបានចេញបទបញ្ជាគ្រប់គ្រងចលនា ហៅថា MCO 3.0 ចំនួនពីរសប្តាហ៍ទៀតចាប់ពីថ្ងៃទី១៥ ដល់ថ្ងៃទី២៨ ខែមិថុនា បន្ទាប់ពីបំរាមលើកទី១ចាប់ពីថ្ងៃទី១ដល់ថ្ងៃទី១៤ ខែមិថុនាត្រូវបានធ្វើឡើង ប៉ុន្តែស្ថានភាពកូវីដ-១៩មិនទាន់ល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីជាន់ខ្ពស់ក្រសួងការពារជាតិលោក Ismail Sabri Yaakob បានប្រកាសនៅក្នុងសេចក្តីថ្លែងការណ៍មួយនៅថ្ងៃសុក្រ ទី១១ ខែមិថុនាថា ការសម្រេចបន្តបទបញ្ជាគ្រប់គ្រងចលនាត្រូវបានធ្វើទៀតដោយសារករណីឆ្លងកូវីដ-១៩ថ្មីប្រចាំថ្ងៃនៅតែលើ៥០០០នាក់រហូត។

លោកបាននិយាយបន្ទាប់ពីចូលរួមកិច្ចប្រជុំក្រុមប្រឹក្សាសន្តិសុខជាតិថា ៖«សកម្មភាពហាមឃាត និងអនុញ្ញាត និងយន្តការប្រតិបត្តិស្តង់ដារ (SOPs)សម្រាប់រាល់សកម្មភាពផលិតកម្ម ពាណិជ្ជកម្ម និងឧស្សាហកម្មនៅតែបន្តដូចការប្រកាសមុន»។

ក្នុងខែឧសភា បទបញ្ជាគ្រប់គ្រងចលនាទូទាំងប្រទេសត្រូវបានដាក់សាជាថ្មីនៅប្រទេសម៉ាឡេស៊ីចំពេលការផ្ទុះកូវីដ-១៩លើកទី៣។

បំរាមបិទទូទាំងប្រទេស MCO 3.0 គឺវិស័យសេដ្ឋកិច្ចទាំងអស់ត្រូវបានអនុញ្ញាតឲ្យបើកដំណើរការកំឡុងពេលនោះ ប៉ុន្តែការធ្វើដំណើរឆ្លងកាត់ស្រុក-ខណ្ឌ និងរដ្ឋមិនត្រូវបានអនុញ្ញាតឡើយ រួមទាំងសកម្មភាពសង្គម កីឡា និងការសិក្សាក៏ហាមដែរ។

ការិយាល័យនាយករដ្ឋមន្ត្រីបាននិយាយថា ការរឹតត្បិតលើវិស័យសេដ្ឋកិច្ច និងសង្គមកិច្ចក្រោយមកត្រូវបានប្រកាសនៅថ្ងៃទី២១ ខែឧសភា បន្ទាប់ពីករណីឆ្លងសហគមន៍បានផ្ទុះឡើងខ្លាំង។ ការផ្ទុះវីរុសបំប្លែងខ្លួនថ្មីបានធ្វើឲ្យកិច្ចខិតខំប្រឹងប្រែងដើម្បីទប់ស្កាត់ជួបការលំបាក។

ការឆ្លងប្រចាំថ្ងៃខ្ពស់បំផុតដល់៩០០០នាក់កាលពីថ្ងៃទី២៩ ខែឧសភា មុនពេលបំរាមទូទាំងប្រទេសត្រូវបានប្រកាសដាក់ចាប់ពីថ្ងៃទី១ ដល់ថ្ងៃទី១៤ ខែមិថុនា។

យ៉ាងណា ក្នុងរយៈពេលជិនពីរសប្តាហ៍ចុងក្រោយនេះមានការធ្លាក់ចុះតិចតូច ប៉ុន្តែស្ថានភាពនៅតែអាក្រក់ ជាពិសេសការផ្ទុះឆ្លងជាចង្កោមត្រូវបានរកឃើញ៦០កន្លែងទូទាំងប្រទេសដោយការមានការជួបជុំពិធីសាសនា។

កាលពីថ្ងៃសុក្រ ម្សិលមិញនេះមានករណីឆ្លងកូវីដ-១៩ថ្មីចំនួន ៦៨៤៦នាក់ ដូច្នេះរដ្ឋាភិបាលសម្រេចបន្តពីរសប្តាហ៍ទៀត។ រហូតដល់ពេលនេះ ប្រទេសម៉ាឡេស៊ីមានករណីឆ្លងសរុបទាំងប្រទេសចំនួន ៦៤៦ ៤១១នាក់៕

ប្រែសម្រួល៖ វីរបុត្រ
ប្រភព៖ CNA