ប៉ូលិសបារាំងបោសសម្អាតមនុស្សជាង ២ ពាន់នាក់ចេញពីជំរំជនភៀសខ្លួនបណ្តោះអាសន្ននៅជិតទីក្រុងប៉ារីស

ប៉ូលិសបារាំងបានបោសសម្អាតមនុស្សជាង ២,០០០ នាក់ចេញពីជំរំជនភៀសខ្លួនបណ្តោះអាសន្នមួយនៅភាគខាងជើងទីក្រុង Saint-Denis ជាយក្រុងប៉ារីសនៅព្រឹកព្រលឹមថ្ងៃអង្គារនេះ ។

ទន្ទឹមនោះការជម្លៀសនេះអាជ្ញាធរបារាំងបានប្រើរថយន្តក្រុងចំនួន ៧០ គ្រឿងដើម្បីដឹកជញ្ជូនជនចំណាកស្រុកទៅកាន់មណ្ឌលស្នាក់នៅចំនួន ២៦ ។

បន្ថែមពីនេះក្រុមពន្លត់អគ្គិភ័យនៅទីក្រុងប៉ារីសក៏ត្រូវបានដាក់ពង្រាយទៅកាន់ទីតាំងនោះផងដែរ ខណៈដែលជនចំណាកស្រុកបានចាប់ផ្តើមដុតរបស់របរមុនពេលចាកចេញពីជំរំ ។

ស្របពេលជាមួយគ្នានេះអ្នកស្ម័គ្រចិត្តមកពីសមាគម Solidarité Migrants Wilson ក៏បានមកដល់ដើម្បីជួយរុះរើតង់ និងជួយប្រមូលរបស់របររបស់ជនចំណាកស្រុកផងដែរ ។

លោក Philippe Caro មកពីសមាគម Solidarité Migrants Wilson បាននិយាយថា “ស្ថានភាពនេះមានការព្រួយបារម្ភខ្លាំងណាស់ ។ យើងមិនអាចចែកចាយម៉ាសទៅកាន់ពួកគេបានទេ ។

ស្ថានីយ៍រថភ្លើងក្រោមដីទីក្រុង Saint-Denis ត្រូវបានបិទរហូតដល់ម៉ោង ១២ យប់សម្រាប់ហេតុផលសុវត្ថិភាព ។

យោងតាមអង្គការបារាំង Terre Asile បានឲ្យដឹងថា ជនអន្តោប្រវេសន៍ប្រហែលជា ២,៤០០ នាក់កំពុងរស់នៅក្នុងជំរំដែលត្រូវបានពង្រីកតាំងពីខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik