ម៉ាឡេស៊ី យល់ព្រមឲ្យប្រើប្រាស់ជាបន្ទាន់នូវវ៉ាក់សាំងកូវីដ​ ចាក់តែមួយដូស របស់អាមេរិក និងចិន

ប្រទេសម៉ាឡេស៊ី បានផ្តល់ការយល់ព្រមតាមលក្ខខណ្ឌ សម្រាប់ការប្រើប្រាស់ជាបន្ទាន់នូវវ៉ាក់សាំងកូវីដ ចាក់តែមួយដូសដែលផលិតដោយក្រុមហ៊ុនជីវសាស្ត្រ CanSino របស់ប្រទេសចិន និងក្រុមហ៊ុនផលិតឱសថអាមេរិក Johnson & Johnson។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលមានការដាក់ចេញនូវវិធានការរាំងខ្ទប់ ប្រទេសនៅតំបន់អាស៊ីអាគ្នេយ៍មួយនេះ កំពុ​ងតែពន្លឿនកម្មវិធីចាក់វ៉ាក់សាំងរបស់ខ្លួន ដើម្បីទប់ស្កាត់ការកើនឡើងនៃការឆ្លងវីរុសកូវីដ-១៩។

ក្រសួងសុខាភិបាល បាននិយាយនៅក្នុងសេចក្តីថ្លែងការណ៍មួយថា ប្រទេសម៉ាឡេស៊ីនឹងទទួលបានវ៉ាក់សាំង Johnson & Johnson តាមរយៈកម្មវិធី COVAX ដែលគាំទ្រដោយអង្គការសុខភាពពិភពលោក។ យ៉ាងណាក្តី ក្រសួង មិនបាននិយាយថាតើវ៉ាក់សាំងចំនួនប៉ុន្មានដូសដែលខ្លួននឹងទទួលបាន តាមរយៈ COVAX នោះទេ។

រដ្ឋាភិបាលធ្លាប់និយាយថា ខ្លួននឹងទទួលបានវ៉ាក់សាំង CanSino ចំនួន៣.៥លានដូស ថ្វីបើខ្លួនមិនទាន់ទទួលបានថ្នាំបង្ការណាមួយក៏ដោយ។

ក្រសួងក៏បានអនុម័តការប្រើវ៉ាក់សាំង ដែលផលិតដោយក្រុមហ៊ុនឱសថអាមេរិកនិងអាឡឺម៉ង់ Pfizer និង BioNTech សម្រាប់អ្នកមានអាយុចាប់ពី ១២ ឆ្នាំឡើងទៅផងដែរ។

ប្រទេសម៉ាឡេស៊ី ទទួលបានវ៉ាក់សាំងសរុបចំនួន ៧៩.៥ លានដូស ដែលអាចចាក់ដល់ជិត ១២៥ ភាគរយនៃប្រជាជនរបស់ខ្លួន រួមទាំងថ្នាំបង្ការដែលផលិតដោយក្រុមហ៊ុន AstraZeneca របស់ចក្រភពអង់គ្លេសនិងក្រុមហ៊ុនចិន Sinovac ផងដែរ។

គួរបញ្ជាក់ថា នៅថ្ងៃអង្គារនេះ ប្រទេសម៉ាឡេស៊ី បានរាយការណ៍អំពីការឆ្លងជំងឺកូវីដ-១៩ថ្មីចំនួន ៥,៤១៩ករណី ដោយនាំឲ្យការឆ្លងសរុបកើនដល់ ៦៦៧,៨៧៦ករណី រីឯអ្នកស្លាប់សរុបមានចំនួន ៣,៩៦៨នាក់៕

ប្រែសម្រួល៖ Vann Vann

ប្រភព៖ Asian One

ចុចអាន៖ ក្រោយករណីឆ្លងធ្ងន់ធ្ងរខ្លាំងពេក ម៉ាឡេស៊ី អនុម័តប្រើប្រាស់វ៉ាក់សាំង Pfizer សម្រាប់ក្មេងអាយុ ១២ ឆ្នាំឡើងទៅ