ប្រសើរណាស់! ប្រទេស មួយទៀតនៅអឺរ៉ុប លែងឲ្យប្រជាជនពាក់ម៉ាសនៅទីតាំងបើកចំហ

ប្រទេសបារាំង បានលុបចោលតម្រូវការពាក់ម៉ាសនៅទីតាំងបើកចំហ ហើយនឹងបញ្ចប់បម្រាមគោចរនៅពេលយប់មុនពេលកំណត់ បន្ទាប់ពីមានភាពប្រសើរឡើង នៃការគ្រប់គ្រងស្ថានភាពជំងឺកូវីដ ១៩ ។

នាយករដ្ឋមន្រ្តីបារាំងលោក Jean Castex បានប្រាប់ក្រុមអ្នកយកព័ត៌មានកាលពីថ្ងៃពុធថា ករណីឆ្លងថ្មីប្រចាំថ្ងៃបានធ្លាក់ចុះដល់ជាង ៣,០០០ ករណី ខណៈករណីឆ្លងខ្ពស់ឡើងដល់ ៥,០០០ ករណី ។ លោកបាននិយាយថា ស្ថានការណ៍កំពុងតែប្រសើរឡើងលឿនជាងការរំពឹងទុក ។

លោក Castex បានប្រកាសថា ការពាក់ម៉ាសនៅទីតាំងបើកចំហ ដែលត្រូវបានតម្រូវចាប់តាំងពីខែសីហាឆ្នាំទៅ នឹងត្រូវលុបចេញចាប់ពីថ្ងៃព្រហស្បតិ៍នេះទៅ ។

ប៉ុន្តែលោកបានកត់សម្គាល់ថា ការពាក់ម៉ាសនឹងនៅតែចាំបាច់ នៅក្នុងកាលៈទេសៈជាក់លាក់ ដូចជានៅក្នុងកីឡដ្ឋាន និងកន្លែងដែលមានមនុស្សច្រើន ។

លោក Castex ក៏បាននិយាយផងដែរថា បម្រាមគោចរនៅម៉ោង ១១ យប់ នឹងត្រូវដកចេញនៅថ្ងៃអាទិត្យខាងមុខ ពោល ១០ ថ្ងៃមុនពេលកំណត់ ។

លោកនាយករដ្ឋមន្រ្តីបានបន្ថែមទៀតថា វិធានការធ្វើចត្តាឡីស័ក នឹងនៅតែរឹតបន្តឹងនៅអាកាសយានដ្ឋាន និងកំពង់ផែសមុទ្រ ដើម្បីទប់ស្កាត់វីរុសបំប្លែងខ្លួនឥណ្ឌា “Delta” ខណៈដែលឥឡូវនេះកំពុងរីករាលខ្លាំងនៅចក្រភពអង់គ្លេស និងកន្លែងផ្សេងទៀត ។

លោកបាននិយាយថា រដ្ឋាភិបាលក៏គ្រោងនឹងចាក់វ៉ាក់សាំងការពារជំងឺកូវីដ ១៩ ដូសដំបូងដល់ប្រជាជនបារាំងចំនួន ៦០ ភាគរយ ពោល ៤០ លាននាក់នៅចុងខែសីហានេះ ខណៈប្រជាជន ៣៥ លាននាក់បានចាក់វ៉ាក់សាំងពេញ ២ ដូសរួចហើយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មេដឹកនាំ អង់គ្លេស និងបារាំង​ ថា កូវីដមិនមែនចេញពីមន្ទីរពិសោធន៍ទេ ហើយចាត់ទុកវីរុសនេះជាសត្រូវរួមរបស់មនុស្សជាតិ