មេក្រុមហ៊ុន BioNTech អាចទទួលពានរង្វាន់ណូបែល សម្រាប់ការបង្កើតវ៉ាក់សាំងការពារកូវីដ

មេដឹកនាំបក្សប្រឆាំងទួរគីម្នាក់ នឹងធ្វើគ្រប់បែបយ៉ាងនៅក្នុងសភា ដើម្បីឲ្យសហស្ថាបនិកដើមកំណើតទួរគី របស់ក្រុមហ៊ុនឱសថអាល្លឺម៉ង់ BioNTech ទទួលបាននូវពានរង្វាន់ណូបែល សម្រាប់ការបង្កើតវ៉ាក់សាំងការពារជំងឺកូវីដ ១៩ ។

ថ្លែងទៅកាន់ក្រុមសមាជិកសភារបស់គណបក្ស (IYI) លោកស្រី Meral Aksener បានកត់សម្គាល់ថា លោក Ugur Sahin និងភរិយាលោកស្រី Ozlem Tureci បានបម្រើសេវាកម្មដ៏អស្ចារ្យដល់មនុស្សជាតិ ចំពោះការអភិវឌ្ឍវ៉ាក់សាំង ។

លោកស្រីបាននិយាយថា សូម្បីតែមុនពេលមានរោគរាតត្បាត ពួកគេក៏ត្រូវបានគេគោរពនៅក្នុងរង្វង់អ្នកវិទ្យាសាស្ត្រផងដែរ ដោយសារតែការសិក្សាស្រាវជ្រាវលើជំងឺមហារីក ។

លោកស្រីបាននិយាយថា “ហេតុដូច្នេះហើយ ថ្ងៃនេះក្នុងនាមជាគណបក្ស IYI យើងនឹងទាមទារឲ្យសភាជាតិទួរគី តែងតាំងអ្នកវិទ្យាសាស្ត្រទាំងពីររូបដែលជាមោទនភាពរបស់ទួគី សម្រាប់ពានរង្វាន់ណូបែល ដោយសារការបរិច្ចាគរបស់ពួកគេ ចំពោះមនុស្សជាតិ និងពិភពវិទ្យាសាស្ត្រ” ។

លោកស្រីបានបន្ថែមទៀតថា “លោក Ugur Sahin និងលោកស្រី Ozlem Tureci គឺជាកុមារដែលមិនអាចបំភ្លេចបាន និងស្មោះត្រង់នៃប្រទេសទួរគី ដែលយើងនឹងចងចាំជារៀងរហូតដោយមោទនភាព” ។

ក្រុមហ៊ុនឱសថ BioNTech ដែលត្រូវបានបង្កើតឡើងដោយលោកស្រី Tureci និងលោក Sahin ដែលជាកូនរបស់ជនអន្តោប្រវេសន៍ទួរគី នៅក្នុងប្រទេសអាល្លឺម៉ង់ក្នុងឆ្នាំ ២០០៨ បានគ្រប់គ្រងការបង្កើតវ៉ាក់សាំងការពារជំងឺកូវីដ ១៩ ដែលមានប្រសិទ្ធិភាពដំបូងគេនៅលើពិភពលោក រួមគ្នាជាមួយដៃគូអាមេរិកឈ្មោះ Pfizer ។

គួរបញ្ជាក់ថា ក្រុមហ៊ុន BioNTech មានគោលបំណងផលិតវ៉ាក់សាំងសរុបចំនួន ២ ពាន់លានដូសនៅឆ្នាំនេះ នៅឯកន្លែងផលិតកម្មចំនួន ៦ នៅក្នុងប្រទេសផ្សេងៗគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ CEO ក្រុមហ៊ុន BioNTech ថា កូវីដនឹងបន្តរាលដាលពាសពេញពិភពលោកដល់ឆ្នាំ ២០២២ បើប្រទេសមួយចំនួននៅតែខ្វះខាតវ៉ាក់សាំង

ចុចអាន ៖ ក្រុមហ៊ុនល្បីឈ្មោះមួយចេញមុខអះអាងថា វ៉ាក់សាំងរបស់ខ្លួនអាចយកឈ្នះវីរុសបំប្លែងខ្លួនឥណ្ឌា