ផ្ទុះវិញហើយ! អង់គ្លេស រកឃើញអ្នកឆ្លងកូវីដថ្មីជាង ១១,០០០ ករណី ក្នុងនោះវីរុសបំប្លែងខ្លួនឥណ្ឌាស្ទើរតែទាំងអស់

ប្រទេសអង់គ្លេសបានបញ្ជាក់ពីចំនួនឆ្លងថ្មីនៃជំងឺកូវីដ ១៩ ខ្ពស់បំផុត ចាប់តាំងពីចុងខែកុម្ភៈ ដោយសារតែការរីករាលដាលយ៉ាងឆាប់រហ័ស នៃវីរុសបំប្លែងខ្លួនឥណ្ឌា “Delta” ។

មន្ត្រីសុខាភិបាលអង់គ្លេសបានរាយការណ៍ពីករណីឆ្លងថ្មីចំនួន ១១,០០៧ ករណីកាលពីថ្ងៃព្រហស្បតិ៍ ខណៈចំនួននៃការចូលសម្រាកព្យាបាលនៅតាមមន្ទីរពេទ្យ ក៏មានការកើនឡើងផងដែរ ដោយបច្ចុប្បន្នមនុស្សជាង ១,០០០ នាក់កំពុងទទួលការព្យាបាល ។

ទន្ទឹមនោះក្រុមមន្រ្តីប៉ាន់ប្រមាណថា វីរុសបំប្លែងខ្លួនឥណ្ឌា “Delta” ដែលពួកគេជឿថាឆ្លងរហ័សជាងវីរុសបំប្លែងខ្លួនអង់គ្លេស “Alpha” មានជាង ៩០ ភាគរយនៃករណីឆ្លងថ្មីៗនេះ ខណៈវីរុសបំប្លែងខ្លួនឥណ្ឌា “Delta” បានរីករាលដាលយ៉ាងឆាប់រហ័សនៅក្នុងប្រទេស ចាប់តាំងពីខែមុន ។

អ្នកវិភាគនិយាយថា ការឆ្លងថ្មីៗជាច្រើននេះ ស្ថិតក្នុងចំណោមមនុស្សវ័យក្មេងដែលមិនបានចាក់វ៉ាក់សាំង ។

ចាប់ផ្តើមពីថ្ងៃសុក្រនេះទៅ មន្ត្រីមានគម្រោងពង្រីកសិទ្ធិទទួលការចាក់វ៉ាក់សាំង ដើម្បីគ្របដណ្តប់លើបុគ្គលទាំងអស់ ដែលមានអាយុចាប់ពី ១៨ ឆ្នាំឡើងទៅ ។

បន្ថែមពីនេះ ក្រុមមន្រ្តីជឿជាក់ថា ការចាក់វ៉ាក់សាំង ២ ដងមានប្រសិទ្ធភាពប្រឆាំងនឹងវីរុសបំប្លែងខ្លួនឥណ្ឌា “Delta” នេះ ខណៈពួកគេក៏កំពុងកាត់បន្ថយចន្លោះពេល ដែលត្រូវបានណែនាំចំពោះការចាក់វ៉ាក់សាំង ដល់ប្រជាជនដែលមានអាយុចាប់ពី ៤០ ឆ្នាំឡើងទៅផងដែរ ពោលពី ១២ សប្តាហ៍មក ៨ សប្តាហ៍វិញ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អង់គ្លេស សុំឲ្យប្រជាជន ៣.៦លាននាក់នៅក្នុងតំបន់ផ្ទុះវីរុសបំប្លែងខ្លួនឥណ្ឌាខ្លាំង កុំចេញទៅណា

ចុចអាន ៖ អង់គ្លេស រកឃើញវិធីព្យាបាលកូវីដថ្មី ដែលអាចជួយសង្គ្រោះជីវិត និងកាត់បន្ថយហានិភ័យ ឈឺធ្ងន់