នាយករដ្ឋមន្រ្តីឥណ្ឌាអបអរសាទរជ័យជម្នះលោក Biden ក្នុងជំនួបសន្ទនាតាមទូរស័ព្ទ

ក្រសួងការបរទេសឥណ្ឌាបាននិយាយនៅថ្ងៃពុធ ទី ១៨ ខែវិច្ឆិកា នេះថា នាយករដ្ឋមន្រ្តីឥណ្ឌាលោក Narendra Modi បានជួបសន្ទនាតាមទូរស័ព្ទជាលើកដំបូងជាមួយប្រធានាធិបតីជាប់ឆ្នោតអាមេរិកលោក Joe Biden ហើយពួកគេបានយល់ព្រមធ្វើការយ៉ាងជិតស្និទ្ធដើម្បីជំរុញភាពជាដៃគូយុទ្ធសាស្ត្រសកលរវាងឥណ្ឌូ និងសហរដ្ឋអាមេរិក ។

ក្រសួងបាននិយាយនៅក្នុងសេចក្តីថ្លែងការណ៍មួយថា លោក Modi បានអបអរសាទរចំពោះលោក Biden អំឡុងពេលនៃការជួបសន្ទនារបស់ពួកគេ ហើយអ្នកទាំងពីរបានពិភាក្សាអំពីអាទិភាពរបស់ពួកគេរាប់បញ្ចូលទាំងរោគរាតត្បាតកូវីដ ១៩ ការទទួលបានវ៉ាក់សាំងដែលមានតម្លៃសមរម្យ ដោះស្រាយការប្រែប្រួលអាកាសធាតុ និងសហប្រតិបត្តិការនៅក្នុងតំបន់ឥណ្ឌូប៉ាស៊ីហ្វិក ។

ទន្ទឹមនោះលោក Modi ក៏បានសរសេរសារលើបណ្ដាញ Twitter អបអរសាទរចំពោះលោក Biden និងអនុប្រធានាធិបតីលោកស្រី Kamala Harris កាលពីថ្ងៃទី ៨ ខែវិច្ឆិកា ផងដែរ ។

បន្ថែមពីនេះលោក Modi ក៏បានរំឭកអំពីអន្តរកម្មដំបូងរបស់លោកជាមួយលោក Biden ផងដែររាប់បញ្ចូលទាំងក្នុងដំណើរទស្សនកិច្ចផ្លូវការរបស់លោកទៅកាន់សហរដ្ឋអាមេរិកក្នុងឆ្នាំ ២០១៤ និងឆ្នាំ ២០១៦ ៕

ប្រែសម្រួលដោយ ៖ ជីវ័ន្ត

ប្រភព ៖ CNA