ឥណ្ឌាចូលរួមក្នុងសមយុទ្ធកងទ័ពជើងទឹកចំពេលមានភាពតានតឹងជាមួយចិន

ចំពេលមានភាពតានតឹងខ្ពស់ជាមួយចិន ប្រទេសចំនួនបួនរួមទាំងឥណ្ឌាផងដែរបានចាប់ផ្តើមធ្វើសមយុទ្ធកងទ័ពជើងទឹករួមគ្នាកាលពីថ្ងៃអង្គារនៅក្នុងមហាសមុទ្រឥណ្ឌា។

ជាលើកដំបូងក្នុងរយៈពេល១៣ឆ្នាំ ប្រទេសអូស្ត្រាលីបានចូលរួមជាមួយសហរដ្ឋអាមេរិកនិងជប៉ុនក្នុងលំហាត់ប្រចាំឆ្នាំដែលមានឈ្មោះថា​ សមយុទ្ធ Malabar ឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តដាក់បញ្ចូលប្រទេសអូស្រ្តាលីបានកើតឡើងចំពេលដែលឥណ្ឌានិងចិនកំពុងជាប់ក្នុងភាពតានតឹងព្រំដែនដ៏អាក្រក់បំផុតក្នុងរយៈពេលបួនទសវត្សរ៍។

សមយុទ្ធ Malabar បានចាប់ផ្តើមក្នុងនាមជាសមយុទ្ធកងនាវាចរទ្វេភាគីប្រចាំឆ្នាំរវាងឥណ្ឌានិងសហរដ្ឋអាមេរិកក្នុងឆ្នាំ១៩៩២។ ប្រទេសជប៉ុនបានចូលរួមនៅឆ្នាំ២០១៥ហើយអូស្ត្រាលីមិនបានចូលរួមទេចាប់តាំងពីឆ្នាំ២០០៧មក។

នាវាដឹកយន្តហោះពីរគ្រឿងរួមជាមួយនាវាដទៃទៀត, នាវាមុជទឹកនិងយន្តហោះនៃកងនាវាចរនឹងចូលរួមក្នុងប្រតិបត្តិការកងទ័ពជើងទឹកនេះ។ វារួមបញ្ចូលទាំងប្រតិបត្តិការហោះហើរលើអាកាសនិងសមយុទ្ធការពារដែនអាកាសកម្រិតខ្ពស់ដោយយន្តហោះចម្បាំង MIG-29K, យន្តហោះចម្បាំង F-18 និងយន្តហោះ E2C Hawkeyes មកពីនាវា Nimitz ផងដែរ។

កងនាវាចរឥណ្ឌាបាននិយាយនៅក្នុងសេចក្តីថ្លែងការណ៍មួយថា “សមយុទ្ធប្រយុទ្ធកម្រិតខ្ពស់និងប្រឆាំងនាវាមុជទឹកនិងការបំពាក់អាវុធក៏នឹងត្រូវបានអនុវត្តដើម្បីពង្រឹងអន្តរប្រតិបត្តិការនិងការធ្វើសមាហរណកម្មរវាងកងទ័ពជើងទឹកទាំង៤ប្រទេសផងដែរ” ។

គួរបញ្ជាក់ថា ដំណាក់កាលដំបូងនៃសមយុទ្ធនេះបានបញ្ចប់កាលពីថ្ងៃទី៦ខែវិច្ឆិកា៕

ប្រែសម្រួលដោយ៖ Vann Vann

ប្រភព៖ Anadolu