តៃវ៉ាន់ ត្រៀមទទួលវ៉ាក់សាំងច្រើនជាងការសន្យាពី អាមេរិក រំពឹងមកដល់ល្ងាចនេះ

កោះតៃវ៉ាន់ត្រៀមនឹងទទួលវ៉ាក់សាំងការពារជំងឺកូវីដ ១៩ ចំនួន ២.៥ លានដូសពីសហរដ្ឋអាមេរិកនៅថ្ងៃអាទិត្យនេះ ហើយវាជាចំនួនច្រើនជាងអ្វីដែលអាមេរិកបានប្រកាសកាលពីពេលមុន ។

វិទ្យាស្ថានអាមេរិកនៅតៃវ៉ាន់ (AIT) បានបង្ហាញពីផែនការនេះនៅលើហ្វេសប៊ុកកាលពីយប់ថ្ងៃសៅរ៍ ដោយបានសរសេរថា “AIT ក៏ដូចជាកោះតៃវ៉ាន់ ទន្ទឹងរង់ចាំការមកដល់វ៉ាក់សាំង Moderna ចំនួន ២.៥ លានដូស ដែលបានផ្តល់ដោយរដ្ឋាភិបាលសហរដ្ឋអាមេរិក” ។

AIT បានបន្ថែមទៀតថា “ការបរិច្ចាគនេះ ឆ្លុះបញ្ចាំងពីការប្តេជ្ញាចិត្តរបស់យើងចំពោះតៃវ៉ាន់ ក្នុងនាមជាមិត្តដែលទុកចិត្ត និងជាសមាជិកនៃគ្រួសារប្រជាធិបតេយ្យអន្តរជាតិ” ។

ដំបូងឡើយ ការដឹកជញ្ជូននោះមានត្រឹមតែវ៉ាក់សាំង ៧៥ ម៉ឺនដូសប៉ុណ្ណោះ ពោលតាមការសន្យារបស់សមាជិកព្រឹទ្ធសភាលោកស្រី Tammy Duckworth នៅថ្ងៃទី ៦ ខែមិថុនា នៅពេលសមាជិកព្រឹទ្ធសភាអាមេរិកមួយក្រុម បានធ្វើទស្សនកិច្ចនៅទីក្រុងតៃប៉ិ ។

ទន្ទឹមនោះ អាជ្ញាធរតៃវ៉ាន់និយាយថា យន្ដហោះដឹកវ៉ាក់សាំងរំពឹងថានឹងមកដល់កោះតៃវ៉ាន់នៅល្ងាចថ្ងៃអាទិត្យនេះ ។

គួរបញ្ជាក់ថា តៃវ៉ាន់កំពុងដើរយឺតនៅក្នុងយុទ្ធនាការចាក់វ៉ាក់សាំងការពារជំងឺកូវីដ ១៩ ខណៈរហូតមកដល់ពេលនេះកោះតៃវ៉ាន់ទើបតែទទួលបានវ៉ាក់សាំងពីបរទេសច្រើនជាង ២.៣ លានដូសប៉ុណ្ណោះ ក្នុងនោះ ១.២៤ លានពីប្រទេសជប៉ុន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តៃវ៉ាន់ ក្លាយជាកោះទី ១ នឹងទទួលវ៉ាក់សាំង ៧៥ ម៉ឺនដូសពី សហរដ្ឋអាមេរិក តាមការសន្យា