ទើបទទួលពី ជប៉ុន ពេលនេះ វៀតណាម បន្តរកបានវ៉ាក់សាំងពីប្រទេសក្បែរខាងមួយទៀត

រដ្ឋាភិបាលវៀតណាមបានប្រកាសថា ខ្លួនបានទទួលវ៉ាក់សាំងការពារជំងឺកូវីដ ១៩ ចំនួនកន្លះលានដូស ដែលត្រូវបានបង្កើតឡើងដោយក្រុមហ៊ុនផលិតឱសថចិន Sinopharm ។

រដ្ឋាភិបាលបាននិយាយថា វ៉ាក់សាំងដែលផ្តល់ដោយប្រទេសចិននេះ បានមកដល់អាកាសយានដ្ឋានមួយក្នុងទីក្រុងហាណូយ កាលពីរសៀលថ្ងៃអាទិត្យ ។

វ៉ាក់សាំងនេះសម្រាប់ប្រជាជនដូចជា កម្មករចិននៅក្នុងប្រទេស និងជនជាតិវៀតណាម ដែលមានគម្រោងទៅធ្វើការ ឬសិក្សានៅប្រទេសចិន ។

ប្រទេសវៀតណាម គឺជាសមាជិកតែមួយគត់នៃសមាគមប្រជាជាតិអាស៊ីអាគ្នេយ៍ ដែលមិនបានទទួលការផ្ដល់វ៉ាក់សាំងពីប្រទេសចិន ។ ប៉ុន្តែប្រទេសនេះបានអនុម័តវ៉ាក់សាំង Sinopharm សម្រាប់ប្រើជាបន្ទាន់នៅដើមខែមិថុនា ។

បច្ចុប្បន្ន ប្រទេសនេះត្រូវការវ៉ាក់សាំងជាបន្ទាន់ ខណៈករណីឆ្លងបានកើនឡើងយ៉ាងខ្លាំង ចាប់តាំងពីចុងខែមេសា មក ។

គិតត្រឹមពេលនេះ ប្រទេសវៀតណាមមានតែប្រជាជនចំនួន ២.៣ ភាគរយប៉ុណ្ណោះ ដែលបានទទួលយ៉ាងហោចណាស់មួយដូស គិតត្រឹមថ្ងៃសៅរ៍ ។

គួររំឭកថា មុនទទួលបានវ៉ាក់សាំងពីចិន ប្រទេសវៀតណាមក៏ទើបទទួលការដឹកជញ្ជូនវ៉ាក់សាំងពីប្រទេសជប៉ុន កាលពីដើមខែនេះដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ទីបំផុត វៀតណាម ទទួលបានវ៉ាក់សាំងការពារកូវីដ ដែលផ្ដល់ដោយ ជប៉ុន ហើយ

ចុចអាន ៖ ស្ងាត់​ៗ​ វៀតណាម ​កំពុង​សាក​ល្បង​វ៉ាក់​សាំង​កូវីដ​ផលិត​ខ្លួន​ឯង ៤ ប្រភេទ