ប្រទេស ម្ចាស់ផ្ទះបាល់ទាត់ពិភពលោកឆ្នាំ ២០២២ ចរចារកវ៉ាក់សាំង មួយលានដូស ចាក់ដល់អ្នកគាំទ្រចូលទស្សនា

នាយករដ្ឋមន្រ្តីប្រទេសកាតាបានប្រកាសថា ទីក្រុងដូហាកំពុងស្វែងរកការចាក់វ៉ាក់សាំងការពារជំងឺកូវីដ ១៩ ចំនួនមួយលានដូស ដល់អ្នកគាំទ្រដែលចូលរួមព្រឹត្តិការណ៍កីឡាបាល់ទាត់ពិភពលោក World Cup ឆ្នាំ ២០២២ នៅក្នុងប្រទេសនេះ ។ នេះបើយោងតាមប្រព័ន្ធផ្សព្វផ្សាយរដ្ឋ បានរាយការណ៍កាលពីថ្ងៃអាទិត្យ ។

យោងតាមទីភ្នាក់ងារសារព័ត៌មានផ្លូវការរបស់កាតា (QNA) បានឲ្យដឹងថា លោកនាយករដ្ឋមន្ត្រី Sheikh Khalid bin Khalifa bin Abdulaziz Al-Thani បាននិយាយថា “ប្រទេសមួយចំនួននឹងមិនអាចចាក់វ៉ាក់សាំងដល់ពលរដ្ឋរបស់ពួកគេទាំងអស់បាននោះទេ” ។

លោកបន្តថា “ប្រទេសកាតា នឹងមិនអនុញ្ញាតឲ្យអ្នកគាំទ្រចូលទស្សនាក្នុងកីឡដ្ឋាន ដោយមិនបានចាក់វ៉ាក់សាំងប្រឆាំងនឹងវីរុសពេញ ២ ដូសឡើយ” ។

លោកបានបន្ថែមទៀតថា “នោះហើយជាមូលហេតុដែលយើងកំពុងចរចា ជាមួយក្រុមហ៊ុនមួយក្នុងការផ្តល់វ៉ាក់សាំងចំនួនមួយលានដូស” ។

លោកបញ្ជាក់ថា “គោលដៅសំខាន់របស់យើងក្នុងការចាក់វ៉ាក់សាំង ដល់អ្នកដែលមកប្រទេសកាតាដើម្បីចូលរួមការប្រកួតបាល់ទាត់ពិភពលោក គឺដើម្បីការពារសុខភាពសាធារណៈរបស់ប្រជាពលរដ្ឋ និងប្រជាជនទូទៅ” ។

គួរបញ្ជាក់ថា គិតត្រឹមពេលនេះ ប្រទេសកាតា មានករណីឆ្លងជំងឺកូវីដ ១៩ សរុប ២២០,៨០០ ករណី និងមានអ្នកស្លាប់ ៥៨៣ នាក់ ខណៈមានអ្នកជាសះស្បើយ ២១៨,២៤៤ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ វ៉ាក់សាំងចាក់តែមួយដូសរបស់ រុស្ស៊ី មានប្រសិទ្ធភាពការពារវីរុសបំប្លែងខ្លួនដែលកំពុងអុកឡុកពិភពលោកគ្រប់ប្រភេទទាំងអស់