ស្ងាត់ៗ រុស្ស៊ី ត្រៀមសាកល្បងវ៉ាក់សាំង Sputnik V លើក្មេងជំទង់

មជ្ឈមណ្ឌលស្រាវជ្រាវ Gamaleya របស់ប្រទេសរុស្ស៊ី នឹងចាប់ផ្តើមសាកល្បងវ៉ាក់សាំង Sputnik V របស់ខ្លួនលើក្មេងជំទង់ ដែលមានអាយុចន្លោះពី ១២ ទៅ ១៧ ឆ្នាំនៅតាមមណ្ឌលវេជ្ជសាស្រ្តរបស់ទីក្រុងម៉ូស្គូនៅខែកក្កដា ខណៈការជ្រើសរើសអ្នកស្ម័គ្រចិត្តកំពុងបន្តធ្វើ ។

ទន្ទឹមនោះ អភិបាលក្រុងម៉ូស្គូលោកស្រី Anastasia Rakova បានប្រកាសកាលពីថ្ងៃចន្ទនេះថា “នៅដើមខែកក្កដា ការសាកល្បងព្យាបាលនៃវ៉ាក់សាំង Sputnik V លើក្មេងជំទង់ដែលមានអាយុពី ១២ ទៅ ១៧ ឆ្នាំនឹងចាប់ផ្តើមនៅរដ្ឋធានីរុស្ស៊ី” ។

លោកស្រី Rakova បានប្រាប់អ្នកសារព័ត៌មានថា “ផ្អែកលើលទ្ធផលនៃការសាកល្បង វានឹងអាចធ្វើទៅបាន សម្រាប់ការសម្រេចចិត្តចាក់វ៉ាក់សាំងដល់ក្មេងជំទង់ ក្នុងយុទ្ធនាការចាក់វ៉ាក់សាំងប្រឆាំងនឹងជំងឺកូវីដ ១៩ ដោយក្នុងនោះ មនុស្សសរុបចំនួន ៣៥០ នាក់នឹងចូលរួមក្នុងការសាកល្បងនេះ ពោល ១០០ នាក់ក្នុងដំណាក់កាលទី ១ និងទី ២ ហើយ ២៥០ បន្ថែមទៀតក្នុងដំណាក់កាលទី ៣” ។

លោកស្រីបញ្ជាក់ថា “បច្ចុប្បន្ន យើងកំពុងធ្វើការជ្រើសរើសអ្នកស្ម័គ្រចិត្តបឋម សម្រាប់ដំណាក់កាលទី ១ និងទី ២” ។

ចំណែកយោងតាមអភិបាលរងក្រុងបានឲ្យដឹងថា ក្មេងជំទង់ដែលមិនបានឆ្លងជំងឺកូវីដ ១៩ នឹងអាចចូលរួមក្នុងការសាកល្បងនេះ ខណៈពួកគេនឹងទទួលការចាក់វ៉ាក់សាំងកម្រិតទាបជាងមនុស្សពេញវ័យ ៕

ប្រែសម្រួលដោយ ៖ ជីវ័ន្ត

ប្រភព ៖ UP

ចុចអាន ៖ វ៉ាក់សាំងចាក់តែមួយដូសរបស់ រុស្ស៊ី មានប្រសិទ្ធភាពការពារវីរុសបំប្លែងខ្លួនដែលកំពុងអុកឡុកពិភពលោកគ្រប់ប្រភេទទាំងអស់