ព័ត៌មានអន្ដរជាតិ

WHO ប្រាប់ថា ប្រទេសក្រីក្រច្រើនកំពុងអស់វ៉ាក់សាំងបង្ការកូវីដ

បានផុស

៣ years មុន

នៅ

ថ្ងៃអង្គារ ២២ មិថុនា ២០២១

ដោយ

ប្រទេសក្រីក្រជាច្រើនដែលទទួលវ៉ាក់សាំងបង្ការកូវីដ-១៩តាមរយៈកម្មវិធីសកល Covax មិនមានវ៉ាក់សាំងគ្រប់គ្រាន់ដើម្បីបន្តយុទ្ធនាការណ៍ចាក់វ៉ាក់សាំងរបស់ខ្លួនទៀតទេ។ នេះជាការលើកឡើងរបស់អង្គការសុខភាពពិភពលោក។

ទីប្រឹក្សាជាន់ខ្ពស់របស់អង្គការសុខភាពពិភពលោក (WHO) លោកបណ្ឌិត Bruce Aylward បាននិយាយថា កម្មវិធី Covax បានចែកចាយវ៉ាក់សាំងចំនួន៩០លានដូសដល់ប្រទេសចំនួន១៣១ទូទាំងពិភពលោក។ ប៉ុន្តែចំនួនទាំងនេះតិចណាស់ដែលមិនគ្រប់គ្រាន់សម្រាប់ចាក់ដល់ប្រជាជនច្រើននៅតាមបណ្តាប្រទេសខ្វះខាតទាំងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កង្វះវ៉ាក់សាំងបានកើនមានឡើងស្របពេលប្រទេសមួយចំនួននៅអាហ្វ្រិកបានកំពុងទទួលរងការវាយប្រហារកូវីដ-១៩លើកទី៣យ៉ាងខ្លាំង។

កាលពីថ្ងៃចន្ទ ប្រធានាធិបតីអាហ្វ្រិកខាងត្បូង លោក Cyril Ramaphosa បានអំពាវនាវឲ្យបញ្ឈប់ការរក្សាទុកវ៉ាក់សាំងរបស់បណ្តាប្រទេសអ្នកមាន ខណៈរដ្ឋាភិបាលរបស់លោកកំពុងរឹតត្បិតទប់ស្កាត់ការរាលដាលឆ្លង។

លោក Ramaphosa បានឲ្យដឹងថា គិតជាកម្រិតទ្វីប វ៉ាក់សាំងតែ៤០លានដូសប៉ុណ្ណោះបានចាក់ដល់ប្រជាជននៅអាហ្វ្រិកដែលតិចជាង២%នៃប្រជាជន។

ដើម្បីដោះស្រាយបញ្ហានេះ លោកបាននិយាយថា រដ្ឋាភិបាលរបស់លោកកំពុងធ្វើការជាមួយគម្រោង Covax ដើម្បីបង្កើតមណ្ឌលប្រចាំតំបន់សម្រាប់ការផលិតវ៉ាក់សាំងនៅអាហ្វ្រិកខាងត្បូង។

គម្រោង Covax ត្រូវបានបង្កើតឡើងកាលពីឆ្នាំមុនដោយ WHO ដើម្បីធានាការចែកចាយវ៉ាក់សាំងបង្ការកូវីដ-១៩គ្រប់គ្រាន់ដល់ប្រទេសក្រីក្រទូទាំងពិភពលោកដែលប្រទេសអ្នកមានឧបត្ថម្ភ។ គោលដៅរបស់គម្រោងនេះគឺចែកវ៉ាក់សាំងឲ្យបាន២ប៊ីលានដូសនៅបំណាច់ឆ្នាំ២០២១។