WHO រកវិធានការប្រឆាំងកូវីដក្នុងព្រឹត្តិការណ៍អូឡាំពិកក្រុងតូក្យូ ក្រោយជប៉ុនអនុញ្ញាតឲ្យហ្វេនចូលមើលដល់ ១ ម៉ឺននាក់

អង្គការសុខភាពពិភពលោក (WHO) និយាយថា ខ្លួននឹងពិភាក្សាពីវិធានការប្រឆាំងនឹងជំងឺកូវីដ ១៩ សម្រាប់ព្រឹត្តិការណ៍អូឡាំពិកទីក្រុងតូក្យូ ជាមួយអាជ្ញាធរជប៉ុន និងគណៈកម្មាធិការអូឡាំពិកអន្តរជាតិ (IOC) នៅសប្តាហ៍នេះ ។

មន្រ្តីអូឡាំពិកទីក្រុងតូក្យូកាលពីថ្ងៃចន្ទ បានសម្រេចចិត្តអនុញ្ញាតឲ្យអ្នកទស្សនាក្នុងស្រុក រហូតដល់ទៅ ១០,០០០ នាក់នៅក្នុងព្រឹត្តិការណ៍អូឡាំពិក ខណៈកន្លែងនីមួយៗតម្រូវមិនឲ្យលើសពីសមត្ថភាពផ្ទុកមនុស្ស ៥០ ភាគរយឡើយ ។

នៅក្នុងសន្និសីទសារព័ត៌មានមួយ លោក Michael Ryan ជាប្រធានកម្មវិធីសង្គ្រោះបន្ទាន់ផ្នែកសុខភាពរបស់អង្គការសុខភាពពិភពលោក បាននិយាយថា អត្រាឆ្លងនៅប្រទេសជប៉ុនបានធ្លាក់ចុះជាបន្តបន្ទាប់ ក្នុងរយៈពេលប៉ុន្មានសប្តាហ៍ចុងក្រោយនេះ ។

លោកបានសង្កត់ធ្ងន់ថា អត្រាឆ្លងនៅក្នុងប្រទេសជប៉ុន គឺទាបជាងប្រទេសដទៃទៀតដែលព្រឹត្តិការណ៍ធំៗកំពុងកើតឡើង ។

លោក Ryan បាននិយាយថា WHO នឹងជួបជាមួយគណៈកម្មាធិការរៀបចំទីក្រុងតូក្យូ រដ្ឋាភិបាលជប៉ុន និង IOC ដើម្បីពិចារណាលើវិធានការណ៍ផ្សេងៗគ្នា រាប់បញ្ចូលទាំងការធ្វើរោគវិនិច្ឆ័យ ការតាមដាន និងវិធីសាស្ត្រត្រួតពិនិត្យជាដើម ។

គួរបញ្ជាក់ថា ព្រឹត្តិការណ៍កីឡាអូឡាំពិករដូវក្តៅនៅទីក្រុងតូក្យូ ត្រូវបានគ្រោងទុកជាដំបូងនៅឆ្នាំ ២០២០ ប៉ុន្តែត្រូវបានពន្យារពេលនៅនិទាឃរដូវឆ្នាំមុន ដោយសារតែការរីករាលដាលនៃជំងឺឆ្លងកូវីដ ១៩ ។ ចំណែកការប្រកួតកីឡានៅរដូវក្ដៅឆ្នាំនេះវិញ នឹងធ្វើឡើងចាប់ពីថ្ងៃទី ២៣ ខែកក្កដា រហូតដល់ថ្ងៃទី ៨ ខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូនខ្មែរអស្ចារ្យ! កីឡាករមុជទឹកតំណាងអាមេរិកនៅអូឡាំពិក គឺជាក្មេងកំព្រា ដើមកំណើតនៅក្រុង​ ព្រះសីហនុ

ចុចអាន ៖ ជប៉ុន ពិចារណាឲ្យអ្នកគាំទ្រក្នុងប្រទេសចូលទស្សនាការប្រកួតកីឡាអូឡាំពិក តែហាមស្រែកអបអរសាទរ