ឆ្លងច្រើនឡើងៗ ថៃ អស់គ្រែដាក់អ្នកជំងឺធ្ងន់ធ្ងរខណៈស្ថានភាព កាន់តែគួរឲ្យព្រួយបារម្ភ

អាជ្ញាធរសុខាភិបាលថៃ បាននិយាយកាលពីថ្ងៃអង្គារថា គ្រែដែលធ្វើឡើងសម្រាប់ព្យាបាលអ្នកជំងឺកូវីដ ស្ថិតក្នុងស្ថានភាពធ្ងន់ធ្ងរនៅមន្ទីរពេទ្យរដ្ឋទាំងអស់ក្នុងទីក្រុងបាងកក ឥឡូវដាក់ ពេញអស់ទៅហើយ។

លោកវេជ្ជបណ្ឌិត Somsak Akksilp អគ្គនាយកនៃនាយកដ្ឋានសេវាកម្មវេជ្ជសាស្រ្ត បានឲ្យដឹងថា “ស្ថិតក្នុងកាលៈទេសៈបច្ចុប្បន្ន អ្នកជំងឺចូលសម្រាកព្យាបាលលើគ្រែពេទ្យ ដែលមានឧបករណ៍សង្គ្រោះជីវិត គឺត្រូវបានដាក់កំហិត”។

លោកនិយាយថា ស្ថានភាពខ្វះគ្រែនៅមន្ទីរពេទ្យ គឺជាក្តីព្រួយបារម្ភយ៉ាងខ្លាំង នាពេលបច្ចុប្បន្ននេះ ជាពិសេស ចាប់តាំងពីតម្រូវការ គ្រែពេទ្យប្រភេទនេះ មានកម្រិតខ្ពស់ ក្នុងចំណោមអ្នក ជំងឺដែលស្ថិតក្នុងក្រុមមានហានិភ័យពណ៌លឿ និងក្រហម ដែលជាក្រុមមានហានិភ័យខ្លាំង។

អ្នកជំងឺនៅក្នុងក្រុមពណ៌លឿង គឺជាអ្នកដែលមានរោគសញ្ញាកម្រិតមធ្យមហើយប្រឈមនឹងការវិវត្តទៅជាស្ថានភាពធ្ងន់ធ្ងរ ខណៈដែលអ្នកជំងឺនៅក្នុងក្រុមពណ៌ក្រហម កំពុងបង្ហាញរោគសញ្ញាធ្ងន់ធ្ងររួចទៅហើយ។

ក្នុងរយៈពេលប៉ុន្មានខែកន្លងមកនេះ ទីក្រុងបាងកកនិងខេត្តជុំវិញរបស់ខ្លួន បានបន្តកត់ត្រានូវករណីឆ្លងថ្មីលើស ១,០០០ ករណីក្នុងមួយថ្ងៃ ដែលបណ្តាលឲ្យមានការកើនឡើងយ៉ាងខ្លាំងនៃចំនួនអ្នកជំងឺទាំងក្នុងក្រុមលឿងនិងក្រហម។

មជ្ឈមណ្ឌលគ្រប់គ្រងស្ថានភាពជំងឺកូវីដ-១៩ (CCSA) បានកត់ត្រាអ្នកស្លាប់ដោយសារជំងឺកូវីដ-១៩ចំនួន ៣៥នាក់បន្ថែមទៀតនិង ការឆ្លងថ្មីចំនួន ៤,០៥៩ករណី កាលពីថ្ងៃអង្គារ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ បើក ភ្លើង ខៀវ គម្រោងទេសចរណ៍ នៅ ភូកេត អត់ ចាំ បាច់ ធ្វើ ចត្តាឡីស័ក