ទីបំផុត វីរុសបំប្លែងខ្លួនថ្មី “Delta Plus” មានអ្នកឆ្លងក្នុងប្រទេស ឥណ្ឌា ហើយ

រដ្ឋាភិបាលឥណ្ឌាបានជូនដំណឹងកាលពីថ្ងៃអង្គារថា វីរុសបំប្លែងខ្លួនថ្មី “Delta Plus” ចំនួន ២២ ករណីហើយ ត្រូវបានរកឃើញនៅក្នុងប្រទេសឥណ្ឌា ។

វីរុស Delta Plus ថ្មីនេះ បានកកើតឡើង ដោយសារតែធាតុបំប្លែងនៅក្នុងវីរុសបំប្លែងខ្លួន Delta ឬ B.1.617.2 ដែលត្រូវបានគេរកឃើញជាលើកដំបូងនៅក្នុងប្រទេសឥណ្ឌា និងជាវីរុសដែលជំរុញឲ្យមានរលកទី ២ ដ៏សាហាវ ។

រដ្ឋមន្រ្តីក្រសួងសុខាភិបាលលោក Rajesh Bhushan បាននិយាយនៅក្នុងសន្និសីទសារព័ត៌មានថា “វីរុសបំប្លែងខ្លួនថ្មី “Delta Plus” ចំនួន ២២ ករណី ត្រូវបានគេរកឃើញនៅរដ្ឋ Maharashtra រដ្ឋ Kerala និងរដ្ឋ Madhya Pradesh ។

សេចក្តីថ្លែងការណ៍មួយដោយក្រសួងសុខាភិបាលបាននិយាយថា “ផ្អែកលើការរកឃើញថ្មីៗនេះរបស់ INSACOG ក្រសួងសុខាភិបាលបានប្រកាសថា ក្រសួងបានជូនដំណឹង និងណែនាំដល់រដ្ឋ Maharashtra រដ្ឋ Kerala និងរដ្ឋ Madhya Pradesh ទាក់ទងនឹងវីរុសកូវីដ ១៩ បំប្លែងខ្លួនថ្មី Delta Plus ដែលត្រូវបានរកឃើញនៅក្នុងរដ្ឋទាំងនេះ” ។

ក្រសួងសុខាភិបាលឥណ្ឌាបាននិយាយថា បច្ចុប្បន្នវីរុស Delta Plus ត្រូវបានរកឃើញនៅក្នុងប្រទេសចំនួន ៩ រួមមានចក្រភពអង់គ្លេស សហរដ្ឋអាមេរិក ជប៉ុន រុស្ស៊ី ឥណ្ឌា ព័រទុយហ្គាល់ ស្វីស នេប៉ាល់ និងចិន ។

ទន្ទឹមនោះ អ្នកជំនាញផ្នែកសុខភាពនៅប្រទេសឥណ្ឌាបានព្រមានថា វីរុស Delta Plus អាចនឹងបង្កជារលកទី ៣ នៃជំងឺកូវីដ ១៩ នៅក្នុងប្រទេសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ពេលនេះ វីរុសឥណ្ឌា វិវត្តទៅជាមេរោគបំប្លែងខ្លួនប្រភេទថ្មីមួយទៀត