រុស្ស៊ី បាញ់ទៅលើនាវាចម្បាំង អង់គ្លេស បន្ទាប់ពីចូលដែនទឹកក្បែរតំបន់គ្រីមៀ

ក្រសួងការពារជាតិរុស្ស៊ីនិយាយថា យោធាបានបាញ់ព្រមានទៅលើនាវាចម្បាំងអង់គ្លេស នៅពេលនាវានេះចូលក្នុងដែនទឹករុស្ស៊ីក្បែរតំបន់គ្រីមៀ ។

ក្រសួងបាននិយាយកាលពីថ្ងៃពុធថា នាវាចម្បាំង HMS Defender របស់អង់គ្លេស បានបើកចូលសមុទ្រភាគខាងត្បូងនៃឧបទ្វីបគ្រីមៀនៅសមុទ្រខ្មៅ ។ រុស្ស៊ីបាននិយាយថា ខ្លួនបានព្រមានដល់នាវានោះថា បានរំលោភលើដែនទឹករបស់ប្រទេសរុស្ស៊ី ។

ក្រសួងបាននិយាយថា បន្ទាប់ពីនាវានេះមិនបានឆ្លើយតបនឹងការព្រមាននោះ នាវាល្បាតរបស់រុស្ស៊ីមួយគ្រឿងបានបាញ់ព្រមាន ខណៈយន្តហោះមួយគ្រឿងបានអនុវត្តការទម្លាក់គ្រាប់បែកព្រមាននៅតាមបណ្តោយនាវារបស់អង់គ្លេស ។

ចំណែកក្រសួងការពារជាតិអង់គ្លេសបាននិយាយថា គ្មានការបាញ់ព្រមានណាមួយត្រូវបានបាញ់ទៅលើនាវាពិឃាតនោះទេ ហើយនាវាខ្លួនបានធ្វើដំណើរក្នុងដែនទឹកអ៊ុយក្រែន ស្របតាមច្បាប់អន្តរជាតិ ។

ទន្ទឹមនោះ រដ្ឋមន្រ្តីក្រសួងការពារជាតិអង់គ្លេសលោក Ben Wallace បាននិយាយថា ការបាញ់ប្រហារនោះបានកើតឡើង ក្នុងអំឡុងពេលសមយុទ្ធយោធារបស់រុស្ស៊ី ។

គួរបញ្ជាក់ថា ប្រទេសរុស្ស៊ីបានបញ្ចូលតំបន់គ្រីមៀពីអ៊ុយក្រែនក្នុងឆ្នាំ ២០១៤ ប៉ុន្តែអង់គ្លេសមិនបានទទួលស្គាល់ការបញ្ចូលនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ នាវាពិឃាតបំពាក់មីស៊ីលប្រដេញ អាមេរិក ធ្វើដំណើរទៅសមុទ្រខ្មៅ អនុវត្តប្រតិបត្តិការសន្តិសុខក្នុងតំបន់