ព័ត៌មានអន្ដរជាតិ

កាណាដាតក់ស្លុតរកឃើញផ្នូរថ្មី៧៥១ ជិតសាលារៀនចាស់ជនជាតិដើម

បានផុស

៤ years មុន

នៅ

ថ្ងៃសុក្រ ២៥ មិថុនា ២០២១

ដោយ

ផ្នូរជាង៧៥០ត្រូវបានរកឃើញនៅជិតសាលារៀនកាតូលិកចាស់មួយសម្រាប់កុមារជនជាតិដើមភាគតិចភាគខាងលិចប្រទេសកាណាដា។ នេះបើតាមសំដីរបស់មេដឹកនាំកុលសម្ព័ន្ធមួយបាននិយាយនៅថ្ងៃព្រហស្បតិ៍ និងជាការរកឃើញលើកទី២ដ៏គួរឲ្យសង្វេគក្នុងរយៈមិនដល់មួយខែផង។

ការរកឃើញជាថ្មីបានក្លាយជារូបភាពដ៏សោកសៅនៅក្នុងប្រវត្តិសាស្ត្រប្រទេសកាណាដា និងបានអំពាវនាវដល់សម្តេចប៉ាប និងវិហារកាតូលិកធ្វើការសុំទោសចំពោះការរំលោភបំពាន និងហិង្សានៅសាលារៀន ដែលជាកន្លែងសិស្សត្រូវបានបញ្ចូលទៅក្នុងវប្បធម៌ដ៏លេចធ្លោរបស់ប្រទេស។

ប្រធានកុលសម្ព័ន្ធ Cowessess First Nation លោក Cadmus Delorme បានប្រាប់អ្នកសារព័ត៌មានថា ៖«កាលពីម្សិលមិញ យើងបានរកឃើញផ្នូរ៧៥១នៅជិតសាលារៀនកាតូលិកចាស់ក្នុងខេត្ត Saskatchewan»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា ៖«នេះមិនមែនជាទីកន្លែងបញ្ចុះសពធំទេ។ ទាំងនេះជាផ្នូរដែលមិនមានកំណត់សំគាល់»។ លោកបន្ថែមថា ផ្នូរនីមួយៗនឹងត្រូវបានវាយតម្លៃក្នុងពេលប៉ុន្មានសប្តាហ៍ខាងមុខដើម្បីដឹងថាតើចំនួនជនរងគ្រោះមានប៉ុន្មាន។

លោក Delorme លើកឡើងទៀតថា ផ្នូរដែលបានរកឃើញតាមរយៈគូសផែនទីរាដាចូលក្នុងដីប្រហែលជាពេលតែមួយត្រូវបានកត់សំគាល់ ប៉ុន្តែតំណាងវិហារកាតូលិកបានដកស្លាកសំគាល់ចេញពីផ្នូរទាំងនោះ។ លោកថា ការធ្វើដូច្នេះគឺជាបទឧក្រិដ្ឋមួយនៅក្នុងប្រទេសកាណាដា ហើយពួកគេបានចាត់ទុកកន្លែងនោះថាជាបទឧក្រិដ្ឋមួយ។

ការជិករកនៅសាលារៀន Marieval ដែលមានចម្ងាយ១៥០គីឡូម៉ែត្រពីរដ្ឋធានីខេត្ត Regina បានចាប់ផ្តើមកាលចុងខែឧសភា បន្ទាប់ពីបានរកឃើញសំណល់ឆ្អឹងសិស្សសាលា២១៥នាក់នៅកន្លែងផ្សេងទៀតដូចជាសាលារៀនចាស់ៗនៅ British Columbia។

ការរកឃើញដំបូងនៅសាលារៀន Kamloops តាមរយៈការងារជិកកកាយនៅទីតាំងចាស់ៗជាច្រើនសម្រាប់កុមារជនជាតិដើមទូទាំងប្រទេសកាណាដា ដែលទទួលបានជំនួយពីរដ្ឋាភិបាល។

កុមារជនជាតិដើមអាមេរិក Metis និង Inuit ប្រហែល១៥០ ០០០នាក់ត្រូវបានបង្ខំជ្រើសរើសរហូតដល់ទសវត្សរ៍ឆ្នាំ១៩៩០នៅ១៣៩កន្លែងនៃសាលារៀនស្នាក់នៅទូទាំងកាណាដាដែលពួកគេត្រូវបានដាក់ឲ្យដាច់ឆ្ងាយពីក្រុមគ្រួសារ ភាសា និងវប្បធម៌របស់ពួកគេ៕

ប្រែសម្រួល៖ វីរបុត្រ
ប្រភព៖ theguardian