រដ្ឋ Gujarat របស់ឥណ្ឌា ព្រមាន បិទក្រុមហ៊ុនណា ដែលមានបុគ្គលិក មិនចាក់វ៉ាក់សាំង

ថ្វីបើរដ្ឋាភិបាល ប្រកាសបន្ធូរបន្ថយការរឹតបន្តឹង បន្ថែមទៀតក៏ដោយ ក៏ប៉ុន្តែកាលពីថ្ងៃព្រហស្បតិ៍ រដ្ឋាភិបាលរដ្ឋ Gujarat បាន តម្រូវឲ្យអ្នកគ្រប់គ្រង ម្ចាស់និងបុគ្គលិកនៃសហគ្រាសឬអាជីវកម្មទាំងអស់ ត្រូវតែចាក់វ៉ាក់សាំងឲ្យអស់ត្រឹមថ្ងៃទី៣០ខែមិថុនា នៅតាមទីក្រុងនិងទីប្រជុំជនចំនួន ១៨ ដែលនៅជាប់ក្រោមបម្រាមគោចរពេលយប់។

រដ្ឋាភិបាលបានព្រមានថា អង្គភាពណាដែលមិនអនុវត្តតាម ដោយមានបុគ្គលិកមិនចាក់វ៉ាក់សាំង នឹងត្រូវបិទទ្វារ។

បន្ទាប់ពីកិច្ចប្រជុំគណៈកម្មាធិការដឹកនាំដោយលោករដ្ឋមន្រ្តី Vijay Rupani, រដ្ឋាភិបាលរដ្ឋបាននិយាយថា បម្រាមគោចរពេលយប់ នឹងបន្តនៅក្នុងទីក្រុងចំនួន១៨ក្នុងចំណោមទីក្រុងនិងទីប្រជុំជនទាំង៣៦ ដែលបម្រាមកំពុងអនុវត្ត។

នៅក្នុងទីក្រុងទាំង១៨នេះ អ្នកគ្រប់គ្រង ម្ចាស់និងបុគ្គលិកនៃសហគ្រាសឬអាជីវកម្ម ត្រូវតែចាក់វ៉ាក់សាំងនៅត្រឹមថ្ងៃទី៣០ខែមិថុនា។ នៅក្នុងរដ្ឋសេសសល់ អ្នកគ្រប់គ្រង ម្ចាស់និងបុគ្គលិកនៃសហគ្រាសឬអាជីវកម្ម ត្រូវចាក់វ៉ាក់សាំងនៅត្រឹមថ្ងៃទី១០ខែកក្កដា។ នេះបើតាមសេចក្តីប្រកាសព័ត៌មាន ដែលចេញផ្សាយដោយនាយកដ្ឋានព័ត៌មានរដ្ឋ។

គួរបញ្ជាក់ថា កាលពីថ្ងៃព្រហស្បតិ៍ រដ្ឋ Gujarat បានរាយការណ៍ករណីឆ្លងកូវីដថ្មីចំនួន ១២៩ ករណីនិងមានមនុស្សស្លាប់ ២ នាក់៕

ប្រែសម្រួល៖ Vann Vann

ប្រភព៖ India Express

ចុចអាន៖ ជនជាតិឥណ្ឌា មួយគ្រួសារ សម្លាប់ខ្លួន ព្រោះខ្លាចឆ្លង កូវីដ