អ៊ីរ៉ង់ ផលិតបានវ៉ាក់សាំងកូវីដខ្លួនឯង មេដឹកនាំកំពូលចាក់មុនគេ រីឯប្រសិទ្ធភាពជាង ៩០ភាគរយ

មេដឹកនាំកំពូលអ៊ីរ៉ង់ លោក Ali Hosseini Khamenei បានទទួលដូសទី១ នៃវ៉ាក់សាំងការពារជំងឹកូវីដ-១៩ ដែលផលិតក្នុងស្រុកលើកដំបូងបំផុតរបស់ប្រទេសនេះ។

កាលពីថ្ងៃសុក្រ លោក Khamenei បានហៅការអភិវឌ្ឍវ៉ាក់សាំង COVIran Barekat ថាជា “មោទកភាពជាតិ”។

កាលពីខែមករា មេដឹកនាំកំពូលរូបនេះ បានហាមឃាត់ការប្រើប្រាស់វ៉ាក់សាំងដែលផលិតដោយសហរដ្ឋអាមេរិកនិងចក្រភពអង់គ្លេស ជាពិសេសថ្នាំបង្ការដែលត្រូវបានបង្កើតដោយក្រុមហ៊ុន Pfizer និង Moderna ដោយលោកនិយាយថា វ៉ាក់សាំងទាំងនោះ មិនអាចជឿទុកចិត្តបាន។

ការសាកល្បងរបស់វ៉ាក់សាំង COVIran Barekat លើមនុស្ស បានចាប់ផ្តើមនៅចុងខែធ្នូ ហើយអ្នកស្ម័គ្រចិត្តប្រហែល ២៤,០០០ នាក់បានទទួលការចាក់ថ្នាំ ដែលជាផ្នែកមួយនៃការសាកល្បងដំណាក់កាលទី ៣ របស់ខ្លួនដែលទើបតែបញ្ចប់។

វ៉ាក់សាំង COVIran Barekat ទទួលបានការអនុញ្ញាតឲ្យប្រើប្រាស់ជាបន្ទាន់ កាលពីដើមខែនេះ​ ហើយត្រូវបានគេរំពឹងថា នឹងបើកយុទ្ធនាការចាក់ទ្រង់ទ្រាយធំនៅប៉ុន្មានសប្តាហ៍ខាងមុខ។

ថ្វីបើទិន្នន័យវិទ្យាសាស្ត្រលម្អិតរបស់វ៉ាក់សាំងនេះ មិនត្រូវបានផ្សព្វផ្សាយជាសាធារណៈនិងស្ថិតក្រោមការត្រួតពិនិត្យក៏ដោយ អ្នកអភិវឌ្ឍរបស់ខ្លួនបានអះអាងថា វាមានប្រសិទ្ធភាព ៩៣,៥ ភាគរយ ក្នុងចំណោមមនុស្សដែលមានអាយុពី ១៨ ទៅ ៧៥ ឆ្នាំ នៅក្នុងដំណាក់កាលទី ២ នៃការសាកល្បង។

ពួកគេក៏បានអះអាងផងដែរថា ប្រទេសចំនួន ១២ មកពីអាស៊ី អាមេរិកខាងត្បូងនិងអឺរ៉ុបមានបំណងទិញវ៉ាក់សាំងនេះ ប៉ុន្តែមិនបញ្ចេញឈ្មោះប្រទេសទាំងនោះទេ៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ឡើងកាន់តំណែងមិនទាន់បានប៉ុន្មានផង អ៊ីស្រាអែល ថ្កោលទោសប្រធានាធិបតីជាប់ឆ្នោតថ្មីរបស់ អ៊ីរ៉ង់