អ៊ីស្រាអែល នឹងបំផ្លាញវ៉ាក់សាំងកូវីដ រាប់ម៉ឺនដូស ប្រសិនបើគ្មានអ្នកទិញ

ទូរទស្សន៍អ៊ីស្រាអែល (KAN) បានរាយការណ៍កាលពីថ្ងៃចន្ទថា ប្រទេសអ៊ីស្រាអែលនឹងបំផ្លាញវ៉ាក់សាំងការពារជំងឺកូវីដ ១៩ ចំនួន ៨០០,០០០ ដូសដែលជិតដល់កាលបរិច្ឆេទផុតកំណត់ ប្រសិនបើមិនមានប្រទេសណាមួយយល់ព្រមទិញវា ។

ទោះបីទូរទស្សន៍ KAN មិនបានបញ្ជាក់ថាតើ វ៉ាក់សាំងទាំងនោះជារបស់ក្រុមហ៊ុនណាក៏ដោយ តែកាលពីពេលថ្មីៗនេះទីក្រុង Tel Aviv បានទិញវ៉ាក់សាំង Pfizer-BioNTech ។

នៅថ្ងៃទី ១៨ ខែមិថុនា ប្រទេសអ៊ីស្រាអែលបានយល់ព្រមបញ្ជូនវ៉ាក់សាំង Pfizer-BioNTech យ៉ាងហោចណាស់ ១ ​​លានដូសទៅអាជ្ញាធរប៉ាឡេស្ទីន ក្រោមកិច្ចព្រមព្រៀងមួយដែលអាជ្ញាធរនឹងផ្ទេរបរិមាណវ៉ាក់សាំងស្មើទៅនឹងអ៊ីស្រាអែល ដែលបានទិញពីក្រុមហ៊ុន Pfizer ដែលគ្រោងនឹងទទួលនៅក្នុងខែកញ្ញា ឬតុលា ។

ទោះយ៉ាងណា អាជ្ញាធរប៉ាឡេស្ទីនបានលុបចោលកិច្ចព្រមព្រៀងនេះ ពីព្រោះវ៉ាក់សាំងពីប្រទេសអ៊ីស្រាអែល ហាក់ដូចជាហួសសុពលភាព ហើយមិនបានបំពេញតាមលក្ខណៈបច្ចេកទេស របស់ក្រសួងសុខាភិបាលឡើយ ។

គួរបញ្ជាក់ថា អ៊ីស្រាអែលកំពុងប្រើប្រាស់វ៉ាក់សាំង Pfizer-BioNTech និង Moderna ហើយប្រជាជនរបស់ខ្លួនប្រមាណ ៥៩ ភាគរយបានទទួលការចាក់វ៉ាក់សាំងពេញ ២ ដូស ខណៈប្រជាជនប្រហែល ៦២ ភាគរយបានទទួលការចាក់យ៉ាងហោចណាស់ ១ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ថ្មីទៀតហើយ! អ៊ីស្រាអែល រកឃើញដានវីរុសបំប្លែងខ្លួន ឥណ្ឌា នៅក្នុងប្រព័ន្ធលូទឹកស្អុយ