ព័ត៌មានអន្ដរជាតិ

ក្ដៅៗ ថៃ បើករមណីយដ្ឋានកោះ ភូកេត ឡើងវិញ ភ្ញៀវទេសចរមិនចាំបាច់ធ្វើចត្តាឡីស័កឡើយ ឲ្យតែចាក់វ៉ាក់សាំងពេញ ២ ដូស

បានផុស

៤ years មុន

នៅ

ថ្ងៃព្រហស្បតិ៍ ១ កក្កដា ២០២១

ដោយ

រមណីយដ្ឋានកោះដ៏ពេញនិយម ភូកេត នៅភាគខាងត្បូងប្រទេសថៃ បានបើកដំណើរការឡើងវិញសម្រាប់ទេសចរណ៍អន្តរជាតិ នៅថ្ងៃព្រហស្បតិ៍នេះ បន្ទាប់ពីជំងឺកូវីដ ១៩ បានបញ្ឈប់ការមកដល់របស់ភ្ញៀវជាងមួយឆ្នាំ ។

ទន្ទឹមនោះ អ្នកទេសចរមិនចាំបាច់ធ្វើចត្តាឡីស័កទៀតទេ ប្រសិនបើពួកគេបានចាក់វ៉ាក់សាំងប្រឆាំងនឹងជំងឺកូវីដ ១៩ ពេញ ២ ដូសនៅក្នុងប្រទេសរបស់ពួកគេយ៉ាងតិច ១៤ ថ្ងៃ ហើយធ្វើតេស្តអវិជ្ជមាននៅពេលមកដល់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសមាគមទេសចរណ៍កោះភូកេតលោក Bhummikitti Ruktaengam បាននិយាយថា “អ្នកទេសចរនឹងត្រូវរង់ចាំលទ្ធផលតេស្ត នៅក្នុងបន្ទប់សណ្ឋាគាររបស់ពួកគេ ។ ប្រសិនបើតេស្តអវិជ្ជមាន ពួកគេនឹងដើរហើរដោយសេរី” ។

លោកបន្តថា “ពួកគេអាចធ្វើដំណើរដោយសេរី ប៉ុន្តែត្រូវតែស្ថិតនៅក្នុងភូកេត ។ ប្រសិនបើពួកគេមានបំណងចង់ទៅទស្សនា ផ្នែកផ្សេងទៀតនៃប្រទេសថៃ ពួកគេត្រូវចំណាយពេលយ៉ាងហោចណាស់ ១៤ ថ្ងៃនៅភូកេត មុនចាកចេញពីទីនេះ” ។

ភូកេត បានក្លាយជាខេត្តដំបូងបង្អស់នៅក្នុងប្រទេសថៃ ដែលបានស្វាគមន៍ភ្ញៀវទេសចរអន្តរជាតិដោយមិនចាំបាច់មានការធ្វើចត្តាឡីស័ក ហើយនេះគឺជាផ្នែកមួយនៃគម្រោងទេសចរណ៍ ដែលហៅថា «ប្រអប់ខ្សាច់ភូកេត ឬ Phuket Sandbox” ដើម្បីជួយសេដ្ឋកិច្ចឲ្យងើបឡើងវិញពីជំងឺរាតត្បាត ។

បន្ថែមពីនេះ ក្រៅពីទទួលការចាក់វ៉ាក់សាំងពេញ ២ ដូស និងមិនឲ្យធ្វើចត្តាឡីស័ក អ្នកទេសចរអន្តរជាតិដែលមានបំណងចង់ទៅលេងភូកេត ចាប់ពីថ្ងៃទី ១ ខែកក្កដា ក៏ត្រូវតែបំពេញតាមតម្រូវការមួយចំនួនទៀតផងដែរ ។

ពួកគេត្រូវតែទទួលបានវិញ្ញាបនប័ត្របញ្ជាក់សិទ្ធិរស់នៅ (COE) ដែលចេញដោយស្ថានទូតថៃ ។ បន្ទាប់មកក្នុងរយៈពេល ៧២ ម៉ោង មុនពេលហោះហើរទៅប្រទេសថៃ ពួកគេត្រូវទទួលបានវិញ្ញាបនប័ត្រ ដែលបង្ហាញពីលទ្ធផលតេស្តអវិជ្ជមាននៃជំងឺកូវីដ ១៩ ។

អ្វីដែលសំខាន់នោះ កុមារមានអាយុក្រោម ៦ ឆ្នាំដែលធ្វើដំណើរជាមួយឪពុកម្តាយរបស់គេ អាចចូលខេត្តនេះដោយមិនចាំបាច់មានការចាក់វ៉ាក់សាំង ការពារប្រឆាំងនឹងជំងឺកូវីដ ១៩ ឡើយ ៕