មេៗក្រុមឧទ្ទាមកំពុងជួបជុំផឹកស៊ីត្រូវយន្តហោះគ្មានមនុស្សបើករបស់អាមេរិកវាយប្រហារ ស្លាប់១៥នាក់ – Kampuchea Thmey Daily
Connect with us

ព័ត៌មានអន្ដរជាតិ

មេៗក្រុមឧទ្ទាមកំពុងជួបជុំផឹកស៊ីត្រូវយន្តហោះគ្មានមនុស្សបើករបស់អាមេរិកវាយប្រហារ ស្លាប់១៥នាក់

Published

on

ក្រុមឃ្លាំមើលសង្រ្គាមបានរាយការណ៍ថា ការវាយប្រហារដោយយន្តហោះគ្មានមនុស្សបើកបានតម្រង់គោលដៅទៅលើការជួបជុំរបស់មេបញ្ជាការក្រុមឧទ្ទាមនៅក្នុងខេត្ត Idlib ភាគពាយ័ព្យប្រទេសស៊ីរីកាលពីល្ងាចថ្ងៃព្រហស្បតិ៍ដោយបានសម្លាប់មនុស្ស១៥នាក់រួមទាំងជនស៊ីវិលផង។

ក្រុមឃ្លាំមើលសិទ្ធិមនុស្សស៊ីរីបាននិយាយថា ការវាយប្រហារនេះត្រូវបានគេជឿថា ធ្វើឡើងដោយក្រុមចម្រុះប្រឆាំងភេរវកម្មដឹកនាំដោយសហរដ្ឋអាមេរិក។

ក្រុមនេះបន្តថា វាបានតម្រង់គោលដៅទៅលើមេបញ្ជាការនៃក្រុម Hayat Tahrir al-Sham (HTS) ដែលជាក្រុមឆ័ត្ររបស់រណសិរ្ស Nusra ហើយមានទំនាក់ទំនងជាមួយក្រុមអាល់កៃដាខណៈពេលដែលពួកគេកំពុងជប់លៀងផឹកស៊ីពេលល្ងាចនៅក្នុងភូមិ Jakara នៃខេត្ត Idlib ក្បែរព្រំដែនស៊ីរី-ទួរគី។

ក្រុមឃ្លាំមើលដែលមានមូលដ្ឋាននៅចក្រភពអង់គ្លេសមួយនេះបានបន្ថែមថា ការវាយប្រហារនេះក៏បានធ្វើឲ្យមេបញ្ជាការមួយចំនួនរងរបួសផងដែរ។

កាលពីថ្ងៃទី១៥ខែតុលា ការវាយប្រហារដោយយន្តហោះគ្មានមនុស្សបើកស្រដៀងគ្នានេះបានតម្រង់គោលដៅទៅលើរថយន្តមួយគ្រឿងនៅភាគខាងលិចខេត្ត Idlib ដោយបានសម្លាប់ជនឧទ្ទាម២នាក់និងកុមារម្នាក់។

ខេត្ត Idlib បានក្លាយជាបន្ទាយឧទ្ទាមដ៏សំខាន់ចុងក្រោយបង្អស់នៅក្នុងប្រទេសស៊ីរីខណៈ HTS ជាក្រុមឈានមុខក្នុងចំណោមក្រុមផ្សេងៗនៅក្នុងតំបន់៕

ប្រែសម្រួលដោយ៖ Vann Vann

ប្រភព៖ Xinhua

ចុច Like Facebook កម្ពុជាថ្មី

ព័ត៌មានពេញនិយម