ផ្ទុះ​ការ​រិះ​គន់​ឃើញ​ទាហាន​ស្រីអ៊ុយក្រែន​ពាក់​ស្បែក​ជើង​កែងហាត់​ដើរក្បួន

មហាជន​បាន​រិះ​គន់​ចាស់​ដៃ​​លើ​​ក្រសួង​ការពារ​ជាតិ​អ៊ុយក្រែន​ដែល​បាន​ឲ្យ​ទាហាន​ស្រី​ពាក់​ស្បែក​ជើង​កែង​ខ្ពស់​ក្នុង​ការ​ហ្វឹក​ហាត់​ដើរ​ហែ​ក្បួន។

​អ៊ុយក្រែន​កំពុង​ត្រៀម​ខ្លួន​ដើរ​ព្យុះហយាត្រា​យោធា​មួយ​នៅ​ខែ​ក្រោយ​ដើម្បី​​អបអរសាទរឯករាជ្យ​៣០​ឆ្នាំ បន្ទាប់​ពីបែក​ចេញ​ពី​សហភាព​សូវៀត ហើយ​ក្រសួង​ការពារ​ជាតិ​នៅ​ថ្ងៃ​សុក្រ​ម្សិល​មិញ​នេះ​បាន​​ផ្សាយ​​រូប​ថត​ពី​ទាហានស្រី​កំពុង​ហ្វឹក​ហាត់​ដើ​រ​ហែ​ក្បួន​​​ដោយ​​ពាក់​ស្បែក​ជើង​កែង​ខ្ពស់។

យោង​តាម​ប្រភព​ព័ត៌មាន​របស់​ក្រសួង​ការពារ​ជាតិ​បាន​សរសេរ​ដោយ​ស្រង់​សំដី​របស់​ទាហានស្រី​ Ivanna Medvid បាន​និយាយ​ថា ៖«ថ្ងៃ​នេះ​​​ហ្វឹក​ហាត់​លើក​ដំបូង។ ការ​ហ្វឹក​ហាត់​នេះ​​ពាក់​ស្បែង​ជើង​កែងខ្ពស់»។

Medvid បាន​បន្ថែមលើ​មតិ​យោបល់​​ថា ៖«វាបាក​បន្តិច​គឺ​ពិបាក​ជាង​ស្បែក​ជើង​ទាហាន ប៉ុន្តែ​យើង​កំពុង​ព្យាយាម»។

សមាជិក​សភា​អ៊ុយក្រែន​ជា​ច្រើន​ជិត​ស្និទ្ធ​​នឹង​​អតីត​ប្រធានាធិបតីអ៊ុយក្រែន​លោក Petro Poroshenko បាន​បង្ហាញ​ស្បែក​ជើង​​ដល់​សភា និង​ជំរុញ​ឲ្យ​រដ្ឋ​មន្ត្រី​ការពារ​ជាតិ​ពាក់​ស្បែក​ជើង​កែង​​ដើម្បី​ដើរ​ហែ​ក្បួន។

អ្នក​ស្រី Inna Sovsun សមាជិក​គណបក្ស Golos បាន​និយាយ​ដោយ​ចង្អុល​បង្ហាញ​ពី​ហានិភ័យ​ថា ៖«វា​ពិបាក​ស្រមៃ​​ណាស់​ពី​គំនិត​ឆ្គួត​លីលា និង​ជា​គំនិត​គ្រោះ​ថ្នាក់​បែប​នេះ»។

អ្នក​ស្រី​ក៏​និយាយ​ដែរ​ថា ទាហាន​ស្រី​អ៊ុយក្រែន ដូច​ជា​បុរស​ដែរ​គឺ​កំពុង​​ប្រឈម​ហានិភ័យ​នៃ​ជីវិត​របស់​ពួក​គេ និង​មិន​សម​ទទួល​បាន​ការ​មើល​ងាយ​ទេ។

អ៊ុយក្រែន​បាន​កំពុង​ប្រយុទ្ធ​នឹង​ក្រុម​បំបែក​ខ្លួន​ដែល​គាំទ្រ​ដោយ​រុស្ស៊ី​នៅ​ភាគ​ខាង​កើត​​​ប្រទេស​ជា​តំបន់​ឧស្សាហកម្ម​​​ដែល​​ជម្លោះ​​នេះ​​​​បាន​សម្លាប់​មនុស្ស​ជាង​១៣០០០​នាក់​ហើយ​ចាប់​តាំង​ពី​ឆ្នាំ​២០១៤​។

លោក Olena​ Kondratyuk អនុប្រធាន​សភា​បាន​និយាយ​ថា អាជ្ញាធរ​គួរ​សុំ​ទោស​ជា​សាធារណៈ​ចំពោះ​ការ​ធ្វើ​ឲ្យ​អាម៉ាស់​ដល់​ស្ត្រី និង​ធ្វើ​ការ​ស៊ើប​អង្កេត។ ស្ត្រី​ជាង​១៣៥០០​នាក់​បាន​ប្រយុទ្ធ​ក្នុង​ជម្លោះ​បច្ចុប្បន្ន​នេះ។

ស្ត្រី​ជាង​៣១០០០​នាក់​ឥឡូវ​នេះ​បាន​ចូល​បម្រើ​កង​ទ័ព​អ៊ុយក្រែន​ក្នុង​នោះ​ជាង​​៤០០០​នាក់​ជា​មន្ត្រី។

ជម្រើស​នៃ​ពាក់​ស្បែក​ជើងកែង​នេះ​ទទួល​រង​ការ​រិះ​គន់​យ៉ាង​ខ្លាំង​តាម​បណ្តាញ​សង្គម និង​នៅ​ក្នុង​រដ្ឋសភា ហើយ​បាន​ជំរុញ​ឲ្យ​មាន​ការ​ចោទ​ប្រកាន់​ថា ទាហាន​ស្រី​ត្រូវ​បាន​គេ​រំលោភ​បំពាន​ផ្លូវ​ភេទ។

អ្នក​បញ្ចេញ​មតិ​ឈ្មោះ Vitaly Portnikov បាន​និយាយ​ថា ៖«ការ​ដើរ​ហែ​ក្បួន​ពាក់​ស្បែក​ជើង​កែង​ខ្ពស់​គឺ​ជា​រឿង​ដ៏​អាម៉ាស់»។

ម្នាក់​ទៀត​ឈ្មោះ Maria Shapranova​ បាន​ចោទ​ថា ក្រសួង​ការពារ​ជាតិ​ងុប​ងល់​នឹង​ផ្លូវ​ភេទ និង​វង្វែង​ស្មារតី។ នាង​បាន​និយាយ​ថា ៖«ការ​ប្រើ​ស្បែក​ជើង​កែង​ខ្ពស់​នេះ​គឺ​ជា​ការ​ចំអក​ដល់​ស្ត្រី ដែល​វា​ត្រូវ​បាន​គេ​ប្រើ​ក្នុង​ពិភព​សម្រស់​ប៉ុណ្ណោះ»។៕

ប្រែ​សម្រួល៖ វីរបុត្រ
ប្រភព៖ theguardian