ទីបំផុត ហ្វីលីពីន រកឃើញប្រអប់ខ្មៅនៃយន្តហោះយោធាដែលធ្លាក់សម្លាប់មនុស្ស ៥២ នាក់

អគ្គមេបញ្ជាការកងទ័ពលោកឧត្តមសេនីយ៍ Cirilito Sobejana បានប្រាប់ Reuters នៅថ្ងៃអង្គារនេះថា អាជ្ញាធរហ្វីលីពីនបានរកឃើញប្រអប់ខ្មៅពីយន្តហោះកងទ័ពអាកាស ដែលបានធ្លាក់កាលពីចុងសប្តាហ៍ ដោយបានសម្លាប់មនុស្ស ៥២ នាក់ ។

លោក Sobejana បាននិយាយថា យន្តហោះដឹកជញ្ជូនធុន Lockheed C-130 កំពុងដឹកមនុស្សចំនួន ៩៦ នាក់ ដែលភាគច្រើនជាកងទ័ព នៅពេលវាចុះខុសផ្លូវនៅអាកាសយានដ្ឋាន Jolo ក្នុងខេត្ត Sulu ខណៈជនរងគ្រោះដែលបាត់បង់ជីវិត រួមមានបុគ្គលិកយោធាចំនួន ៤៩ នាក់ និងជនស៊ីវិល ៣ នាក់

លោកបាននិយាយកាលពីថ្ងៃអាទិត្យថា យន្ដហោះកំពុងដឹកជញ្ជូនកងទ័ពពីទីក្រុង Cagayan de Oro នៅលើកោះ Mindanao នៅពេលដែលវាបានធ្លាក់នៅម៉ោងប្រហែល ១១ និង ៣០ នាទីថ្ងៃត្រង់ នៅលើកោះ Jolo ។

លោកបញ្ជាក់ថា “យន្ដហោះនេះបានព្យាតាមចុះចតនៅឯអាកាសយានដ្ឋាន Jolo ប៉ុន្តែបានបើកហួស ហើយបានចុះខុសផ្លូវ ។ យន្តហោះនេះ មិនមានពេលវេលា និងកម្ពស់គ្រប់គ្រាន់ ហើយបានធ្លាក់នៅក្បែរតំបន់ Patikul” ។

នៅក្នុងសេចក្ដីថ្លែងការណ៍មួយកាលពីថ្ងៃអាទិត្យ លោក Sobejana បាននិយាយថា “ទាហានមួយចំនួនត្រូវបានគេឃើញលោតចេញពីយន្ដហោះ មុនពេលដែលវាបុកដល់ដី ហើយពួកគេមិនរងគ្រោះពីការផ្ទុះឆេះនោះទេ” ។

គួរបញ្ជាក់ថា ការធ្លាក់យន្តហោះនេះ គឺជាសោកនាដកម្មចុងក្រោយបង្អស់សម្រាប់កងទ័ពអាកាសហ្វីលីពីន ក្នុងឆ្នាំនេះ ខណៈឧទ្ធម្ភាគចក្រមួយគ្រឿងរបស់កងទ័ពអាកាសហ្វីលីពីន ធុន S-70i Black Hawk ដែលទើបនឹងទិញ បានធ្លាក់កាលពីខែមុននៅភាគខាងជើងនៃរដ្ឋធានីម៉ានីល ដោយសម្លាប់សមាជិកនាវិក ៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ធ្លាក់យន្តហោះនៅ ហ្វីលីពីន អ្នកស្លាប់កើនដល់ ៥០ នាក់ របួស ៤៩ នាក់