ព័ត៌មានអន្ដរជាតិ

អាមេរិកដកទ័ពចេញជាង៩០% ខណៈអាហ្វហ្គានីស្ថានប្តេជ្ញាវ៉ៃយកស្រុកទាំងអស់វិញ

បានផុស

៤ years មុន

នៅ

ថ្ងៃពុធ ៧ កក្កដា ២០២១

ដោយ

អាជ្ញាធរអាហ្វហ្គានីស្ថាននៅថ្ងៃអង្គារ៍ ទី៦ ខែមិថុនាបានប្តេជ្ញាដណ្តើមយកស្រុកទាំងអស់ដែលបាត់បង់ទៅតាលីបង់ នៅពេលទ័ពអាមេរិកត្រូវបានដកចេញពីប្រទេសជិតបញ្ចប់។

កម្លាំងកុម្ម៉ង់ដូរាប់រយនាក់ត្រូវបានដាក់ពង្រាយដើម្បីទប់ទល់នឹងការវាយលុករបស់ក្រុមបះបោរនៅភាគខាងជើង មួយថ្ងៃបន្ទាប់កងកម្លាំងរដ្ឋាភិបាលជាង១០០០នាក់បានភៀសខ្លួនទៅប្រទេសជិតខាងតាហ្ស៊ីគីស្តង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាការកណ្តាលអាមេរិកបានប្រកាសថា ការដកទ័ពអាមេរិកចេញពីប្រទេសអាហ្វហ្គានីស្ថាន ដែលតាមបញ្ជារបស់លោកប្រធានាធិបតី ចូ បៃដិន គឺឥឡូវបានធ្វើជាង៩០%ហើយដោយបានគូសបញ្ជាក់ថា កម្លាំងអាហ្វហ្គានីស្ថានកើនឡើងកាន់តែខ្លាំងដែលអាចទប់ទល់ជាមួយពួកតាលីបង់បាន។

ការប្រយុទ្ធគ្នាបានផ្ទុះឡើងនៅតាមបណ្តាខេត្តជាច្រើន ប៉ុន្តែក្រុមបះបោរផ្តោតលើការបំផ្លិចបំផ្លាញទូទាំងតំបន់នៅភាគខាងជើងប្រទេស ដណ្តើមយកស្រុកជាច្រើនក្នុងរយៈពេលពីរខែចុងក្រោយនេះ។

ទីប្រឹក្សាសន្តិសុខជាតិ លោក Hamdullah Mohib បាននិយាយថា ៖«មានសង្គ្រាម មានសម្ពាធ។ ពេលខ្លះអ្វីៗដំណើរការតាមគោលដៅយើង។ ពេលខ្លះមិនដំណើរការទេ តែយើងនឹងបន្តការពារប្រជាជនអាហ្វហ្គានីស្ថាន។ យើងមានផែនការដណ្តើមយកស្រុកទាំងអស់មកវិញ»។

ការដកទ័ពអាមេរិកកំពុងដំណើរការ

មន្ទីរបញ្ចកោណបាននិយាយនៅថ្ងៃអង្គារ៍ម្សិលមិញថា ពួកគេកំពុងស្ថិតនៅលើផ្លូវដើម្បីបញ្ចប់ការដកកងទ័ព និងក្រុមម៉ៅការស៊ីវិលអាមេរិករាប់ពាន់នាក់ត្រឹមចុងខែសីហា ប៉ុន្មានថ្ងៃបន្ទាប់ពីការការប្រគល់មូលដ្ឋានទ័ពចុងក្រោយ និងធំជាងគេក្នុងចំណោមមូលដ្ឋានទ័ពអាកាសអាមេរិកចំនួន៧ Bagram ភាគខាងជើង Kabul ទៅរដ្ឋាភិបាលអាហ្វហ្គានីស្ថានវិញ។

អ្នកនាំពាក្យមន្ទីរបញ្ចកោណលោក John Kirby គូសបញ្ជាក់ថា ដៃគូសម្ព័ន្ធមិត្តអាមេរិក និងណាតូនឹងបន្តគាំទ្រកម្លាំងសន្តិសុខអាហ្វហ្គានីស្ថានក្នុងការប្រយុទ្ធជាមួយតាលីបង់ បើទោះមិនមានកងទ័ពចម្រុះនៅសមរភូមិក៏ដោយ។

លោកថា ៖«យើងនៅមានសិទ្ធិជួយពលរដ្ឋអាហ្វហ្គានីស្ថាននៅតាមសមរភូមិ ប្រសិនបើពួកគេត្រូវការ»។

តាលីបង់កើនឡើងនៅភាគខាងជើងប្រទេស

កងទ័ព និងកងជីវពលគាំទ្ររដ្ឋាភិបាលត្រូវបានដាក់ពង្រាយនៅភាគខាងជើងខេត្ត Takhar និង Badakhshan ដែលជាតំបន់ពួកតាលីបង់កាន់កាប់ភាគច្រើន។