ព័ត៌មានអន្ដរជាតិ

អ៊ីស្រាអែល ឲ្យចាក់វ៉ាក់សាំងការពារកូវីដដូសទី ៣ ដល់មនុស្សពេញវ័យមានប្រព័ន្ធភាពស៊ាំខ្សោយ

បានផុស

៤ years មុន

នៅ

ថ្ងៃអង្គារ ១៣ កក្កដា ២០២១

ដោយ

ក្រសួងសុខាភិបាលអ៊ីស្រាអែលកាលពីថ្ងៃចន្ទ បានណែនាំអង្គការថែរក្សាសុខភាពចំនួន ៤ ឲ្យចាប់ផ្តើមចាក់វ៉ាក់សាំងការពារជំងឺកូវីដ ១៩ ដូសទី ៣ សម្រាប់មនុស្សពេញវ័យដែលមានប្រព័ន្ធភាពស៊ាំចុះខ្សោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្រ្តីក្រសួងសុខាភិបាលលោក Nitzan Horowitz បានប្រកាសពីការចាក់នេះកាលពីថ្ងៃអាទិត្យ ដោយបន្ថែមថា ក្រសួងកំពុងស្វែងរកការអនុញ្ញាត ឲ្យចាក់វ៉ាក់សាំងបន្ថែមទៀត ដល់សាធារណជនទូទៅផងដែរ ។

ការផ្ដល់អនុសាសន៍នេះ បានកើតឡើងចំពេលមានការស្នើសុំរបស់ក្រុមហ៊ុនវ៉ាក់សាំង Pfizer ទៅកាន់និយតករសហរដ្ឋអាមេរិក និងអឺរ៉ុប សម្រាប់ការអនុម័តប្រើប្រាស់វ៉ាក់សាំងដូសទី ៣ របស់ខ្លួន ។

វាក៏កើតឡើង ស្របពេលដែលករណីឆ្លងបានកើនឡើងជាលំដាប់ ហើយភាគច្រើនគឺការវាយលុកពីវីរុសបំប្លែងខ្លួនឥណ្ឌា “Delta” ខណៈកាលពីថ្ងៃអាទិត្យរកឃើញករណីឆ្លងថ្មី ៤២៣ ករណី នៅទូទាំងប្រទេសអ៊ីស្រាអែល ។

គួរបញ្ជាក់ថា ប្រហែល ៦១ ភាគរយនៃពលរដ្ឋ ៩.៣ លាននាក់របស់ប្រទេសនេះ ត្រូវបានចាក់វ៉ាក់សាំងយ៉ាងហោចណាស់មួយដូស ហើយប្រហែល ៥៥ ភាគរយបានចាក់ពេញ ២ ដូស ខណៈដែលពួកគេភាគច្រើនបានទទួលការចាក់វ៉ាក់សាំង Pfizer ៕