គប់គ្រាប់បែកសាំងដាក់អ្នកជិតខាងព្រោះខឹងច្រៀងខារ៉ាអូខេឮៗពេក (មានវីដេអូ)

កាលពីថ្ងៃចុងសប្តាហ៍ បុរសម្នាក់ក្នុងទីក្រុងហាណូយត្រូវបានគេថតជាប់ គប់គ្រាប់បែកសាំងជាច្រើនដបដាក់ផ្ទះអ្នកជិតខាងរបស់គាត់ព្រោះតែអ្នកជិតខាងច្រៀងខារ៉ាអូខេឮៗពេក។

ហេតុការណ៍នេះបានកើតឡើងនៅក្បែរបឹង Trieu Khuc ក្នុងឃុំ Tan Tri ស្រុក Thanh Tri នាម៉ោងប្រហែល១១:៣០នាទីយប់ថ្ងៃសោរ៍។

សាក្សីឃើញផ្ទាល់ភ្នែកបាននិយាយថា ដំបូងពួកគេបានឮការផ្ទុះមួយមុនពេលឃើញបុរសម្នាក់គប់គ្រាប់បែកសាំងពីជាន់ទី៣នៃផ្ទះរបស់គាត់ទៅទីធ្លាផ្ទះអ្នកជិតខាងរបស់គាត់។

គ្រាប់បែកបានផ្ទុះនិងបណ្តាលឲ្យមានអគ្គិភ័យឆាបឆេះដែលធ្វើឲ្យប៉ះពាល់ដល់ផ្ទះនៅក្បែរៗនិងខ្សែភ្លើង។ បន្ទាប់មក បុរសរូបនោះបានចាក់សោរទ្វារផ្ទះរបស់គាត់។

កាសែត Thanh Nien បានរាយការណ៍ថា មនុស្សមួយចំនួនបានរងរបួសរលាកស្រាលបន្ទាប់ពីឧប្បត្តិហេតុនេះ។ កាសែតនេះបានដកស្រង់សម្តីមន្ត្រីប៉ូលិសម្នាក់ដែលនិយាយថា បុរសម្នាក់នោះមានអាយុ៦១ឆ្នាំហើយមិនមានជំងឺផ្លូវចិត្តទេ។ គាត់តែងតែផឹកស្រាហើយឧស្សាហ៍មានអារម្មណ៍ធុញទ្រាន់។

មន្ត្រីរូបនោះបានពន្យល់បន្ថែមថា ឧប្បត្តិហេតុនេះអាចកើតចេញពីសំឡេងខារ៉ាអូខេរំខានឮៗរបស់អ្នកជិតខាងគាត់។

គាត់ត្រូវបានបញ្ជូនទៅមន្ទីរពេទ្យដោយសារតែរលាកដៃធ្ងន់ធ្ងរ៕

ប្រែសម្រួលដោយ៖ Vann Vann

ប្រភព៖ Tuoi Tre News