អាមេរិក កំពុងជួបរលកកម្ដៅខ្លាំងក្លា ផ្នែកខ្លះសីតុណ្ហភាពឡើងដល់ ៥៦ អង្សាសេ ក្ដៅបំផុតលើផែនដី

រលកកម្តៅមួយផ្សេងទៀត ត្រៀមរៀបចំដុតសហរដ្ឋអាមេរិកនៅចុងសប្តាហ៍នេះ ។ វាជាលើកទី ៤ ហើយក្នុងរយៈពេល ៥ សប្តាហ៍ ដែលសីតុណ្ហភាពឡើងខ្លាំងនឹងវាយប្រហារតំបន់ Western US ក៏ដូចជាផ្នែកខ្លះនៃប្រទេសកាណាដា ។

គ្រាន់តែសប្តាហ៍នេះ ជ្រលងភ្នំ Death Valley នៃរដ្ឋកាលីហ្វ័រញ៉ា បានឡើងកម្ដៅដល់ ៥៦ អង្សាសេ ជាកន្លែងក្តៅបំផុតមិនធ្លាប់មាននៅលើផែនដី ខណៈមនុស្សរាប់សិបលាននាក់ កំពុងប្រឈមនឹងការប្រកាសអាសន្នពីរលកកម្ដៅហួសកម្រិតនេះ ។

ទន្ទឹមនោះ រលកកម្ដៅខ្លាំងបំផុត និងគ្រោះរាំងស្ងួតខ្លាំង ក៏កំពុងបង្កឲ្យមានភ្លើងឆេះព្រៃនៅទូទាំងតំបន់ Western U.S ផងដែរ ។

បន្ថែមពីនេះ មជ្ឈមណ្ឌលអគ្គិភ័យអន្តរជាតិបាននិយាយថា អគ្គិភ័យធំៗចំនួន ៦៨ កន្លែងត្រូវបានរាយការណ៍នៅទូទាំងរដ្ឋចំនួន ១២ ហើយវាបានបំផ្លាញផ្ទៃដីជាង ៨១,០០០ ហិកតា ផ្ទះសម្បែងចំនួន ២០ ម៉ឺនខ្នង និងជម្លៀសប្រជាជនរាប់រយនាក់ផងដែរ ។

ស្របពេលជាមួយគ្នានេះ អ្នកជំនាញមួយចំនួនក៏ព្រមានដែរថា ការឡើងកម្តៅផែនដីបច្ចុប្បន្ននេះ អាចជួយពន្លឿនបញ្ហាបរិស្ថានផ្សេងទៀត ឲ្យកាន់តែឆ្ពោះទៅរកភាពមហន្តរាយ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ទម្លាយវីដេអូ បាក់អគារនៅ ទីក្រុង ម៉ៃអាមី សហរដ្ឋ អាមេរិក