គ្រាន់តែប្រទេសមួយនៅអាមេរិកខាងត្បូង រកឃើញវីរុសបំប្លែងខ្លួនដល់ទៅ ១១ប្រភេទ

គិតត្រឹមពេលនេះក្នុងឆ្នាំ២០២១ ប្រទេសឈីលី បានរកឃើញវីរុសកូវីដ-១៩ បំប្លែងខ្លួនរហូតដល់ទៅ១១ប្រភេទ ខណៈវីរុសបំប្លែងខ្លួន Gamma កំពុងរីករាលដាលខ្លាំងបំផុត នៅទូទាំងប្រទេស ហើយវីរុស Delta ដែលទើបចូលថ្មី បានចោទជាបញ្ហាប្រឈមកាន់តែខ្លាំង ដោយសារតែអត្រាចម្លងដ៏ខ្ពស់របស់វា។

លោក Sergio Wehinger នៅសាកលវិទ្យាល័យឈីលី បានប្រាប់ស៊ីនហួថា “ប្រទេសឈីលី កំពុងស្ថិតក្នុងស្ថានភាពប្រកាសអាសន្នដូចបណ្តាប្រទេសដទៃទៀត ដែលមានវីរុសបំប្លែងខ្លួនច្រើនប្រភេទដែរ”។

លោក Wehinger បានផ្តល់អនុសាសន៍ថា ប្រទេសឈីលី គួរសិក្សាបទពិសោធន៍អន្តរជាតិ និងកុំបន្ធូរបន្ថយការរឹតត្បិត បើទោះបីជាមានការថយចុះនៃអត្រាឆ្លងកាលពីខែមុន ដោយសារតែការអនុវត្តវិធានការបិទខ្ទប់និង គម្លាតសង្គមក៏ដោយ។

ស្របពេលករណីមានការថយចុះ ការរឹតត្បិតត្រូវបានបន្ធូរបន្ថយនៅក្នុងទីក្រុងមួយចំនួន ដោ​យអាជីវកម្មនិងសាលារៀន បានបើកដំណើរការឡើងវិញ។ រដ្ឋាភិបាល ក៏បានប្រកាសផងដែរ ពីការរឹតត្បិតតិចតួចលើប្រជាជនជាង១១លាននាក់ ដែលទទួលបានវ៉ាក់សាំង គ្រប់ដូស។

ក្រសួងសុខាភិបាល ឈីលី កាលពីខែមុន បានចេញរបាយការណ៍មួយ ដែលកំណត់អត្តសញ្ញាណវីរុសបំប្លែងខ្លួនចំនួន ១១ ប្រភេទនៅក្នុងប្រទេស ដោយផ្អែកលើការសិក្សាហ្សែននៃសំណាកពីករណីដែលត្រូវបានបញ្ជាក់ ចាប់ពីថ្ងៃទី ២២ ខែធ្នូឆ្នាំ ២០២០ ដល់ថ្ងៃទី ២៥ ខែមិថុនាឆ្នាំ ២០២១។

យោងតាមលោក Wehinger បានឲ្យដឹងថា វីរុសបំប្លែងខ្លួន បានលេចឡើងដោយសារតែកង្វះវិធានការរឹតត្បិតគ្រប់គ្រាន់សម្រាប់អ្នកចូលឬចាកចេញពីប្រទេស។

គួរបញ្ជាក់ថា រហូតមកដល់ពេលនេះ ប្រទេសឈីលី បានកត់ត្រាករណីឆ្លងកូវីដចំនួន ១,៥៩៤,៤៩៦ករណី និងមានអ្នកស្លាប់ចំនួន ៣៤,២០៧នាក់៕

ប្រែសម្រួល៖ Vann Vann

ប្រភព៖ Xinhua

ចុចអាន៖ ទីបំផុត WHO ព្រមានខ្លាំងៗ អំពីការលេចចេញ វីរុសបំប្លែងខ្លួនថ្មីៗ ដែលកាន់តែបង្កគ្រោះថ្នាក់