ព័ត៌មានអន្ដរជាតិ

ខ្លោចចិត្ត វេជ្ជបណ្ឌិតឥណ្ឌូនេស៊ីជាង៥០០នាក់ស្លាប់ដោយកូវីដ

បានផុស

៣ years មុន

នៅ

ថ្ងៃចន្ទ ១៩ កក្កដា ២០២១

ដោយ

យោងតាមសមាគមវេជ្ជបណ្ឌិតបានឲ្យដឹងថា នៅពាក់កណ្តាលដើមខែកក្កដានេះ ករណីស្លាប់វេជ្ជបណ្ឌិតដោយកូវីដ-១៩នៅប្រទេសឥណ្ឌូនេស៊ីបានកើនឡើងយ៉ាងខ្លាំង ដោយសារវីរុសបំប្លែង Delta បានវាយប្រហារខ្លាំង។

មន្ត្រីមកពីសមាគមវេជ្ជបណ្ឌិតឥណ្ឌូនេស៊ី (IDI) បាននិយាយក្នុងសន្និសីទសារព័ត៌មានថា វេជ្ជបណ្ឌិតចំនួន១១៤នាក់បានស្លាប់ក្នុងរយៈពេលត្រឹមតែ១៧ថ្ងៃពោលគឺពីថ្ងៃទី១ ដល់១៧ ខែកក្កដា ដែលនេះជាចំនួនខ្ពស់បំផុតត្រូវបានរាយការណ៍ក្នុងរយៈពេលដូចគ្នាមុនៗ និងជាង២០%នៃចំនួនវេជ្ជបណ្ឌិត៥៤៥នាក់បានស្លាប់ដោយកូវីដ-១៩ចាប់តាំងពីជំងឺនេះកើតឡើង។

លោក Mahesa Paranadipa មន្ត្រីជាន់ខ្ពស់នៅ IDI មានប្រសាសន៍ថា សមាគមព្រួយបារម្ភពីប្រព័ន្ធសុខាភិបាលមិនអាចដោះស្រាយបាន។

ក្រុមវេជ្ជបណ្ឌិតឥណ្ឌូណេស៊ីជួយសង្គ្រោះអ្នកជំងឺកូវីដ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកឡើងថា ៖«យើងពិតជាបារម្ភពីសក្តានុពលនៃការដួលរលំការងារនេះ។ នេះជាទិន្នន័យដែលបានរាយការណ៍ តែមិនទាន់មានទិន្នន័យដែលមិនទាន់រាយការណ៍មកពួកយើងផង»។

ការស្លាប់ក្រុមវេជ្ជបណ្ឌិតបានកើនឡើងនៅក្នុងប្រទេសឥណ្ឌូនេស៊ី ដែលជាប្រទេសមានប្រជាជនច្រើនបំផុតលំដាប់ទី៤ក្នុងពិភពលោក បើទោះជាការចាក់វ៉ាក់សាំងបង្ការកូវីដ-១៩មានដល់៩៥%ចំពោះបុគ្គលិកសុខាភិបាល។ ប្រការនេះបានធ្វើឲ្យរដ្ឋាភិបាលប្រើវ៉ាក់សាំង Moderna ដើម្បីចាក់បន្ថែមដូសទៅលើវ៉ាក់សាំងរបស់ចិន Sinovac សម្រាប់បុគ្គលិកសុខាភិបាល។

ទិន្នន័យជាមធ្យមក្នុងរយៈពេល៧ថ្ងៃចុងក្រោយដែលតាមដានដោយទីភ្នាក់ងារសារព័ត៌មាន Reuters បានបង្ហាញថា ដោយសារតែវីរុសបំប្លែងខ្លួនដ៏កាចសាហាវ Delta វាយប្រហារឆ្លង ឥណ្ឌូនេស៊ីមានករណីឆ្លងកូវីដ-១៩ថ្មីច្រើនជាងប្រទេសណាៗទាំងអស់ក្នុងពិភពលោកប៉ុន្មានថ្ងៃចុងក្រោយនេះ។

ក្រុមអ្នកជំនាញសុខភាពកំពុងហៅប្រទេសនេះថាជាមណ្ឌលថ្មីនៃការរាលដាលកូវីដ-១៩។កាលពីថ្ងៃអាទិត្យ ទី១៨ ខែកក្កដា ម្សិលមិញនេះ ឥណ្ឌូនេស៊ីមានករណីឆ្លងថ្មីចំនួន៤៤ ៧២១នាក់ និងករណីស្លាប់ថ្មី ១០៩៣នាក់៕