សមាជិកសភាជាប់ឆ្នោតថ្មីនៃបក្សកាន់អំណាចរបស់មីយ៉ាន់ម៉ា ត្រូវបានបាញ់សម្លាប់

សមាជិកសភាជាប់ឆ្នោតថ្មីរបស់គណបក្សកាន់អំណាចមីយ៉ាន់ម៉ាត្រូវបានបាញ់សម្លាប់ដោយខ្មាន់កាំភ្លើងមិនស្គាល់អត្តសញ្ញាណម្នាក់នៅភាគខាងជើងនៃរដ្ឋ Shan ហើយគណបក្សនេះកាលពីថ្ងៃអាទិត្យបានជំរុញឲ្យមានការស៊ើបអង្កេតភ្លាមៗ ហើយបានប្រកាសថ្កោលទោសអំពើហិង្សានយោបាយ បន្ទាប់ពីការបោះឆ្នោតក្នុងខែនេះ ។

អ្នកនាំពាក្យគណបក្សលោក Myo Nyunt បាននិយាយថា លោក Htike Zaw ត្រូវបានគេបាញ់សម្លាប់នៅហាងមួយនៅផ្ទះរបស់គាត់នៅទីប្រជុំជន Kyaukme កាលពីថ្ងៃសៅរ៍ ។ បុរសដែលបានស្លាប់នេះបានឈ្នះអាសនៈនៅក្នុងការបោះឆ្នោតសកលកាលពីថ្ងៃទី ៨ ខែវិច្ឆិកា ដែលបាននាំមកនូវជ័យជម្នះយ៉ាងភ្លូកទឹកភ្លូកដីសម្រាប់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ។

លោក Myo Nyunt បានប្រាប់ Reuters តាមទូរស័ព្ទថា “គាត់បានចេញទៅលក់ នៅពេលអតិថិជនមកដល់ ហើយអតិថិជនបានបាញ់គាត់” ។ លោកបានបន្ថែមថា គណបក្សបានស្នើសុំឲ្យអាជ្ញាធរស៊ើបអង្កេតឲ្យបានឆាប់តាមដែលអាចធ្វើទៅបាន ។

លោកបាននិយាយថា “យើងសូមប្រកាសថ្កោលទោសចំពោះអំពើហិង្សានេះ ជាពិសេសអំពើហិង្សាទាក់ទងនឹងនយោបាយដែលមិនល្អសម្រាប់អនាគតប្រទេសយើង” ។

ទន្ទឹមនោះប៉ូលិសក្នុងតំបន់មិនបានឆ្លើយតបតាមទូរស័ព្ទសម្រាប់ការសុំការអត្ថាធិប្បាយនោះទេ ។

ការបោះឆ្នោតនេះគឺធ្វើឡើងត្រឹមតែលើកទី ២ ប៉ុណ្ណោះនៅក្នុងប្រទេសមីយ៉ាន់ម៉ាចាប់តាំងពីចុងពាក់កណ្តាលសតវត្សរ៍នៃការគ្រប់គ្រងដោយយោធាក្នុងឆ្នាំ ២០១១ ហើយគណបក្ស NLD របស់លោកស្រី អ៊ុងសាន ស៊ូជី ទទួលបានជ័យជម្នះគួរឲ្យកត់សម្គាល់ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS