ព័ត៌មានអន្ដរជាតិ

ទោះកូវីដផ្ទុះខ្លាំង ក៏ពលរដ្ឋឥណ្ឌូនេស៊ីរាប់លាននាក់នៅតែប្រារព្ធពិធី Eid al-Adha

បានផុស

៤ years មុន

នៅ

ថ្ងៃពុធ ២១ កក្កដា ២០២១

ដោយ

ប្រជាជនឥណ្ឌូនេស៊ីរាប់លាននាក់នៅថ្ងៃអង្គារ៍ម្សិលមិញនេះបានប្រារព្ធពិធី Eid al-Adha ដែលជាពិធីសាសនាឥស្លាមដ៏សំខាន់មួយ ខណៈលោកប្រធានាធិបតី Joko Widodo បានសន្យាបន្តរឹងបន្តឹងបំរាមរហូតដល់ករណីឆ្លងធ្លាក់ចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីឆ្លងកូវីដ-១៩នៅឥណ្ឌូនេស៊ីថ្មីៗស្ថិតក្នុងចំណោមប្រទេសឆ្លងខ្ពស់បំផុតក្នុងពិភពលោកដោយសារការរាលដាលវីរុសបំប្លែងខ្លួន Delta បើទោះជាវិធានការរឹតត្បិតដ៏តឹងរឹងត្រូវបានដាក់កាលពីដើមខែនេះក៏ដោយ។

លោក Jokowi ដែលជាប្រធានាធិបតីដ៏ល្បីល្បាញបានផ្តល់ដំបូន្មានឲ្យពលរដ្ឋឥណ្ឌូនេស៊ីប្រារព្ធពិធីបុណ្យសាសនា Eid al-Adha នៅតាមផ្ទះ ដោយគោរពគោលការណ៍ទប់ស្កាត់កូវីដ-១៩។ ប៉ូលិស និងអាជ្ញាធរដឹកជញ្ជូនបានដាក់ប៉ុស្តិ៍ត្រួតពិនិត្យដើម្បីរារាំង ការធ្វើដំណើរក្នុងប្រទេសដែលគោរពសាសនាមូល្លីមធំបំផុតក្នុងលោក។

ក្នុងសេចក្តីប្រកាសមុនថ្ងៃឈប់សម្រាកនៃពិធីបុណ្យ លោក Jokowi បាននិយាយថា បំរាមរឹតបន្តឹងនឹងត្រូវបានលើកនៅពេលករណីឆ្លងធ្លាក់ចុះ ដោយកត់សំគាល់ពីវីរុសថ្មីមានន័យថា កូវីដ-១៩មិនទាន់ធូរស្បើយទេ។

លោកមានប្រសាសន៍ថា ៖«សាកស្រមៃមើល ប្រសិនបើការរឹតបន្តឹងនេះត្រូវបានបន្ធូរបន្ថយ អីចឹងករណីឆ្លងនឹងកើនឡើងទៀត ហើយមន្ទីរពេទ្យមិនអាចទ្រាំទ្របានទេ។ ប្រការនេះនឹងធ្វើឲ្យប្រព័ន្ធសុខាភិបាលដួលរលំ»។

ប្រព័ន្ធសុខាភិបាលនៅកន្លែងមួយចំនួនត្រូវបានបង្កើនបន្ថែមដោយសារអ្នកជំងឺកូវីដ-១៩លើសឡប់ ហើយកាលពីថ្ងៃចន្ទមានករណីស្លាប់ថ្មីជាប់កំណត់ត្រាដល់១៣៣៨នាក់។

នៅថ្ងៃអង្គារ៍ម្សិលមិញនេះជាថ្ងៃចុងក្រោយនៃបំរាមនៅ Java និង Bali ព្រមទាំងកន្លែងមួយចំនួនទៀតទូទាំងប្រជុំកោះ ប៉ុន្តែរដ្ឋាភិបាលត្រូវគេរំពឹងថា នឹងប្រកាសបន្តបំរាមទៀត។

រដ្ឋាភិបាលនិយាយថា ខ្លួនចង់ឲ្យករណីឆ្លងប្រចាំថ្ងៃធ្លាក់ចុះមកត្រឹម១ម៉ឺននាក់។ ខណៈចំនួនឆ្លងថ្មីកាលពីថ្ងៃចន្ទ ៣៤ ២៥៧នាក់គឺជាចំនួនទាបបំផុតគិតពីថ្ងៃទី៦ ខែកក្កដាមក អត្រាឆ្លងវីជ្ជមាននៅតែបន្តខ្ពស់ដល់២៦.៩%ភាគ ហើយករណីឆ្លងបានឡើងខ្ពស់បំផុតដល់៥ម៉ឺននាក់កាលពីសប្តាហ៍មុនដែលជាពេលអត្រាធ្វើតេស្តក៏ខ្ពស់។

ពិធីសាសនាមូស្លីម Eid al-Adha ជាពិធីសម្លាប់សត្វដូចជាគោ និងពពែដើម្បីយកសាច់ចែកជូនដល់ក្រុមគ្រួសារ និងជនក្រីក្រ។

វិហារជាច្រើនគ្រោងចែកសាច់ទៅពលរដ្ឋក្រីក្រដល់ផ្ទះផ្ទាល់ដើម្បីការពារកុំឲ្យជួបជុំគ្នាជាច្រើន ប៉ុន្តែវិហារជាច្រើនត្រូវបានគេរាយការណ៍ថា មិនខ្វល់រឿងបំរាម ហើយនាំគ្នាជួបជុំនៅវិហារដើម្បីធ្វើពិធីអធិស្ឋានដដែល៕

ប្រែសម្រួល៖ វីរបុត្រ
ប្រភព៖ CNA