WHO ថា វីរុសបំប្លែងខ្លួនឥណ្ឌា នឹងគ្រប់គ្រងពិភពលោកក្នុងរយៈពេលប៉ុន្មានខែខាងមុខនេះ

អង្គការសុខភាពពិភពលោក (WHO) បាននិយាយកាលពីថ្ងៃពុធថា វីរុសបំប្លែងខ្លួនឥណ្ឌា “Delta” ដែលឆ្លងយ៉ាងឆាប់រហ័ស ត្រូវបានគេរំពឹងថា នឹងក្លាយជាវីរុសគ្របដណ្ដប់ពិភពលោក នៅក្នុងប៉ុន្មានខែខាងមុខនេះ ។

WHO បាននិយាយថាវីរុសបំប្លែងខ្លួន Delta ដែលត្រូវបានរកឃើញដំបូងនៅក្នុងប្រទេសឥណ្ឌា បច្ចុប្បន្នត្រូវបានគេកត់ត្រានៅក្នុងប្រទេស និងដែនដីចំនួន ១២៤ ពោលកើនឡើងចំនួន ១៣ បើធៀបនឹងសប្តាហ៍មុន ។

យោងតាមអង្គការវិទ្យាសាស្ត្រពិភពលោក ហៅកាត់ថា GISAID បានឲ្យដឹងថា ក្នុងរយៈពេល ៤ សប្តាហ៍គិតត្រឹមថ្ងៃទី ២០ ខែកក្កដា អត្រាឆ្លងវីរុសបំប្លែងខ្លួនឥណ្ឌាមានលើសពី ៧៥ ភាគរយនៅក្នុងប្រទេសមួយចំនួន ។

ប្រទេសទាំងនោះរួមមាន អូស្រ្តាលី បង់ក្លាដែស បុតស្វាណា អង់គ្លេស ចិន ដាណឺម៉ាក ឥណ្ឌា ឥណ្ឌូណេស៊ី អ៊ីស្រាអែល ព័រទុយហ្គាល់ រុស្ស៊ី សិង្ហបុរី និងអាហ្វ្រិកខាងត្បូង ។

ទន្ទឹមនោះ ក្នុងចំណោមវីរុសបំប្លែងខ្លួនគួរឲ្យព្រួយបារម្ភចំនួន ៣ ផ្សេងទៀត គឺវីរុសអង់គ្លេស “Alpha” ត្រូវបានគេរាយការណ៍នៅក្នុងប្រទេស និងដែនដីចំនួន ១៨០ ពោលកើនឡើងចំនួន ៦ ពីសប្តាហ៍មុន ។ វីរុសអាហ្វ្រិកខាងត្បូង “Beta” ត្រូវបានគេរាយការណ៍នៅក្នុងប្រទេស និងដែនដីចំនួន ១៣០ កើនឡើងចំនួន ៧ និងវីរុសប្រេស៊ីល Gamma រកឃើញក្នុងប្រទេស និងដែនដីចំនួន ៧៨ កើនឡើងចំនួន ៣ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ WHO លើកចំណុចសំខាន់២ ដែលអាចបញ្ចប់ការរីករាលដាល នៃជំងឺរាតត្បាត