ព័ត៌មានអន្ដរជាតិ

អាមេរិកដាក់ទណ្ឌកម្មលើមន្ត្រីគុយបា ក្រោយបង្ក្រាបលើក្រុមតវ៉ា

បានផុស

៤ years មុន

នៅ

ថ្ងៃសុក្រ ២៣ កក្កដា ២០២១

ដោយ

កាលពីថ្ងៃព្រហស្បតិ៍ម្សិលមិញ រដ្ឋបាលប្រធានាធិបតីសហរដ្ឋអាមេរិក ចូ បៃដិន បានសម្រេចដាក់ទណ្ឌកម្មលើរដ្ឋមន្ត្រីក្រសួងការពារជាតិគុយបា និងក្រុមកម្លាំងពិសេសរបស់ក្រសួងមហាផ្ទៃ។

សម្រាប់ការទណ្ឌកម្មនេះ អាមេរិកបាននិយាយថា ដោយសារពាក់ព័ន្ធដោយផ្ទាល់នៅក្នុងការរំលោភសិទ្ធិមនុស្សកំឡុងពេលការបង្ក្រាបរបស់រដ្ឋាភិបាលទៅលើក្រុមតវ៉ានៅកោះក្នុងខែនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតី ចូ បៃដិន មានប្រសាសន៍ក្នុងសេចក្តីថ្លែងការណ៍មួយថា ៖«វិធានការគឺគ្រាន់តែជាការចាប់ផ្តើមប៉ុណ្ណោះនៃកិច្ចខិតខំប្រឹងប្រែងចំពោះទណ្ឌកម្មទៅលើបុគ្គលដែលទទួលខុសត្រូវសម្រាប់ការគៀបសង្កត់លើពលរដ្ឋគុយបា»។

វិធានការនេះត្រូវបានដាក់ចេញស្របពេលលោក ចូ បៃដិន ប្រឈមនឹងសម្ពាធកំពុងកើនឡើងខ្លាំងពីសភា ក្រុមសកម្មជន និងប្រជាជនអាមេរិកដើមកំណើតគុយបាឲ្យចាត់វិធានការដាច់ខាតដើម្បីគាំទ្រដល់អ្នកតវ៉ានៅកោះ។

រដ្ឋាភិបាលអាមេរិកបាន និងកំពុងស្វែងរកគោលនយោបាយថ្មីបន្តិចៗម្តងទៅលើប្រទេសគុយបាដែលប្រឆាំងនឹងសកម្មភាពជាច្រើនដែលដាក់ចេញដោយអតីតប្រធានាធិបតីលោក ដូណាល់ ត្រាំ ពីការរឹតបន្តឹងធ្វើដំណើរ ពាណិជ្ជកម្ម និងទម្រង់ផ្សេងៗទៀត។ រដ្ឋបាលលោក អូបាម៉ា បានពង្រីកទំនាក់ទំនងនៅពេលដែលចំណង់ការទូតជាមួយរដ្ឋាភិបាលក្រុង Havana នៅឆ្នាំ២០១៥។

ប៉ុន្តែចលាចលកំពុងកើតមាននៅគុយបាក្នុងនោះមានបាតុកម្មមិនធ្លាប់មានបានផ្ទុះឡើងនៅតាមទីក្រុង និងទីប្រជុំជនមួយដែលជំរុញឲ្យមានការចាប់ខ្លួនមនុស្សរាប់រយនាក់ ការវាយប្រហារលើក្រុមតវ៉ាប្រឆាំងនឹងរដ្ឋាភិបាល និងការប៉ុនប៉ងបិទបណ្តាញទំនាក់ទំនងអ៉ឺនធឺណេតដើម្បីរារាំងដល់បាតុកម្មទំនាក់ទំនងគ្នាដែលធ្វើឲ្យរដ្ឋបាល ចូ បៃដិន ដាក់កាលវិភាគថ្មី។

ក្នុងការឆ្លើយតបប៉ុន្មាននាទី បន្ទាប់ពីវិធានការត្រូវបានប្រកាសនៅទីក្រុងវ៉ាស៊ីនតោន រដ្ឋមន្ត្រីក្រសួងការបរទេសគុយបាលោក Bruno Rodríguez បានហៅទណ្ឌកម្មលើលោករដ្ឋមន្ត្រីក្រសួងការពារជាតិ Álvaro López Miera និងក្រុមកម្លាំងពិសេសរបស់ក្រសួងមហាផ្ទៃថា«គ្មានមូលដ្ឋាន និងបង្កាចបង្ខូច៕

ប្រែសម្រួល៖ វីរបុត្រ
ប្រភព៖ washingtonpost