លែងព្រួយ ពេលដឹងច្បាស់ អំពី​វ៉ាក់សាំង Johnson & Johnson ដែលកម្ពុជា នឹងទទួលបានពី អាមេរិក

កាលពីថ្ងៃសុក្រទី ២៣ ខែកក្កដា ស្ថានទូតអាមេរិកប្រចាំកម្ពុជា បាន​បញ្ជាក់ជាថ្មីម្តងទៀត​ថា សហរដ្ឋ​អាមេរិក នឹងផ្ដល់​ជំនួយ​វ៉ាក់សាំង Johnson & Johnson ជាង១លានដូស ដល់កម្ពុជាហើយនឹងដឹកជញ្ជូន​មកក្នុងពេល​ឆាប់ៗ​នេះ។

ការប្រកាសនេះ បានធ្វើឡើងតាម​រយៈការបង្ហោះ Twitter របស់លោក Patrick Murphy ​ឯកអគ្គរដ្ឋទូតប្រចាំ​នៅប្រទេសកម្ពុជា ក្រោយពេលដែលដំណឹងផ្តល់ជំនួយវ៉ាក់សាំងជាង ១លានដូសដែលអាមេរិកសន្យាផ្ដល់​ជូន​កម្ពុជា មិនទាន់លឺចាប់តាំងពីខែឧសភាមក។

ខាងក្រោមនេះ គឺជាព័ត៌មានលម្អិត អំពីវ៉ាក់សាំង Johnson & Johnson៖

ដូស

វ៉ាក់សាំងនេះ ចាក់តែ ១ដូសប៉ុណ្ណោះ ហើយទទួលបានការការពារយូរអង្វែង។

វាត្រូវចំណាយពេល ១៤ ថ្ងៃ ដើម្បីឲ្យវ៉ាក់សាំង បញ្ចេញប្រសិទ្ធភាព។

ភាពស៊ាំ

វ៉ាក់សាំងនេះ បង្រៀនប្រព័ន្ធភាពស៊ាំរបស់អ្នក ពីរបៀបការពារអ្នក ពីជំងឺឆ្លង។

វាកាន់តែមានសុវត្ថិភាព សម្រាប់ប្រព័ន្ធភាពស៊ាំរបស់អ្នក ក្នុងការរៀនអំពីរបៀបដើម្បីការពារអ្នកពីជំងឺកូវីដ-១៩ តាមរយៈការចាក់វ៉ាក់សាំង ជាជាងការចាប់យកវីរុស។

សុវត្ថិភាព

វ៉ាក់សាំង Johnson & Johnson ត្រូវបានបង្កើតឡើង ស្របតាមស្តង់ដារសុវត្ថិភាពអន្តរជាតិ។

វាត្រូវបានសាកល្បង ជាមួយមនុស្សរាប់ពាន់នាក់ ដែលជាផ្នែកមួយនៃការធ្វើតេស្តគ្លីនិក។

ប្រតិកម្ម

ដូចវ៉ាក់សាំងផ្សេងទៀតដែរ, Johnson & Johnson អាចបណ្តាលឲ្យមានប្រតិកម្ម។ ភាគច្រើននៃប្រតិកម្ម គឺមានកម្រិតស្រាលទៅមធ្យម និងមានរយៈពេលខ្លីប៉ុណ្ណោះ។

ទោះបីជាយ៉ាងណាក៏ដោយ មិនមែនគ្រប់គ្នាសុទ្ធតែមានប្រតិកម្មនោះទេ។

ស្រ្តីមានផ្ទៃពោះ

វ៉ាក់សាំង Johnson & Johnson មិនត្រូវបានណែនាំសម្រាប់ស្ត្រីមានផ្ទៃពោះទេ។

គួរពិគ្រោះជាមួយគ្រូពេទ្យឬអ្នកឯកទេសខាងសម្ភព អំពីការចាក់វ៉ាក់សាំង។

ប្រសិនបើអ្នកកំពុងបំបៅកូនដោយទឹកដោះ

អ្នកអាចចាក់វ៉ាក់សាំង Johnson & Johnson បាន ប្រសិនបើអ្នកកំពុងបំបៅកូនដោយទឹកដោះ។

កូវីដ មិនអាចឆ្លងដល់កូនរបស់អ្នកទេ។

ប្រសិទ្ធភាព តម្លៃ និងការរក្សាទុក

វ៉ាក់សាំងនេះមានប្រសិទ្ធភាព៦៦,៣ភាគរយ ជាមួយតម្លៃ ១ដូស ១០ដុល្លារ ហើយអាចទុកក្នុងសីតុណ្ហភាពចន្លោះ២ទៅ៨អង្សាសេ។

ប្រែសម្រួល៖ Vann Vann

ប្រភព៖ HSE

ចុចអាន៖ ប្រសើរណាស់! វ៉ាក់សាំងចាក់តែមួយដូស Johnson & Johnson ដែល កម្ពុជា នឹងទទួលបានមានប្រសិទ្ធភាពការពារវីរុសបំប្លែងខ្លួនច្រើនប្រភេទ