ព័ត៌មានអន្ដរជាតិ

វិបត្តិកូវីដធ្ងន់ធ្ងរខ្លាំង! មន្ទីរពេទ្យនៅ ថៃ ប្រកាសរកអ្នកបរិច្ចាគឈាមសង្គ្រោះជីវិតបន្ទាន់

បានផុស

៤ years មុន

នៅ

ថ្ងៃសៅរ៍ ២៤ កក្កដា ២០២១

ដោយ

ជំងឺរាតត្បាតកំពុងវាយលុកខ្លាំងនៅថៃ ខណៈនេះ មន្ទីពេទ្យ Siriraj បានប្រកាសរកអ្នកស្ម័គ្រចិត្តបរិច្ចាគឈាមជួយសង្គ្រោះជីវិតមនុស្សដែលត្រូវវះកាត់ជាបន្ទាន់។ មូលហេតុគឺដោយសារប្រជាជន ខ្លាចឆ្លងកូវីដ ទើបចំនួនអ្នកបរិច្ចាគឈាមមានការថយចុះខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរពេទ្យ Siriraj បានប្រកាសនិងអញ្ជើញសប្បុរសជនទាំងអស់ ចូលរួមបរិច្ចាគឈាមដើម្បីជួយដល់អ្នកជំងឺបន្ទាន់។ ជាពិសេសអ្នកជំងឺកំពុងរង់ចាំការវះកាត់ រួមទាំងអ្នកជំងឺដែលមានជំងឺឈាម ហើយត្រូវការឈាមខ្លាំងបំផុត។

ទោះខាងមន្ទីពេទ្យត្រូវការឈាមបន្ទាន់យ៉ាងណា ក៏ត្រូវតម្រូវឲ្យអ្នកបរិច្ចាគឈាមមានសុខភាពល្អ ចៀសវាងចម្លងទៅកាន់អ្នកទទួលដូចជា៖ គ្មានហានិភ័យ មិនមែនជាមនុស្សដែលប៉ះឬឆ្លងកូវីដ។ ជាពិសេសកុំប៉ះឬជិតស្និទ្ធជាមួយអ្នកជំងឺដែលសង្ស័យឬឆ្លងជំងឺកូវីដ។ កុំធ្វើដំណើរទៅកន្លែងដែលមានហានិភ័យនៃការឆ្លង ក្នុងរយៈពេល ២ សប្ដាហ៍ចុងក្រោយ ។ ប្រសិនបើបានចាក់វ៉ាក់សាំងរួចហើយ ឬវ៉ាក់សាំងផ្សេងទៀត សូមទុក ៧ ថ្ងៃមុនពេលបរិច្ចាគឈាម។ ប្រសិនបើមានផលប៉ះពាល់ បន្ទាប់ពីការចាក់វ៉ាក់សាំង សូមទុករយៈពេល១៤ ថ្ងៃ បន្ទាប់ពីគ្មានរោគសញ្ញា ទើបអាចបរិច្ចាគឈាមបាន។

មន្ទីរពេទ្យ Siriraj បាននិយាយថា មជ្ឈមណ្ឌលមានប្រព័ន្ធពិនិត្យហានិភ័យប្រកបដោយសុវត្ថិភាព និងស្តង់ដារ។ បុគ្គលិកទាំងអស់ត្រូវបានគេវាយតម្លៃសម្រាប់ហានិភ័យ មុនពេលពួកគេមកធ្វើការ ក៏ដូចជាសម្អាតឧបករណ៍និងទីធ្លាជាប្រចាំ។ សូមអ្នកបរិច្ចាគ កុំបារម្ភឬភ័យថា ខ្លួននឹងឆ្លងរោគពីទីនេះទៅ។

មន្ទីរពេទ្យក៏បានបន្ថែមថា ដោយសាររោគរាតត្បាត បានធ្វើឲ្យខាងមន្ទីរពេទ្យមានកង្វះខាតឈាមធ្ងន់ធ្ងរ ហើយអ្នកជំងឺម្នាក់ៗ កំពុងត្រូវការវះកាត់បន្ទាន់ ជាពិសេសអ្នកជំងឺដែលប្ដូរឈាមជារៀងរាល់ខែ។ ដូច្នេះទើបខាងមន្ទីរពេទ្យត្រូវប្រកាសរកជំនួយ សម្រាប់អ្នកចង់បរិច្ចាគ៕

ប្រែសម្រួល៖ សាង ស្រីល័ក្ខ

ប្រភព៖sanook

ចុចអាន ៖ថៃ ដល់ដំណាក់កាលបែងចែកអុកស៊ីសែន រើសអ្នកជំងឺកូវីដណាត្រូវព្យាបាល និងទុកឲ្យស្លាប់

ចុចអាន៖ប្រធាន Miss Grand International ត្រូវគ្រូពេទ្យដកអុកស៊ីសែន ដើម្បីយកទៅព្យាបាលអ្នកជំងឺកូវីដធ្ងន់ធ្ងរផ្សេងទៀត