អ្នកជាសះស្បើយពីកូវីដ​ នៅតែអាចឆ្លងវីរុសបំប្លែងខ្លួនឥណ្ឌា

របាយការណ៍ផ្លូវការមួយបានរកឃើញថា អ្នកដែលជាសះស្បើយពីជំងឺកូវីដ-១៩ ទំនងជានៅតែឆ្លងរោគម្តងទៀត ដោយសារតែវីរុសបំប្លែងខ្លួនឥណ្ឌាឬ Delta។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេវាសុខភាពសាធារណៈអង់គ្លេស (PHE ) បាននិយាយថា ហានិភ័យជាមួយវីរុសបំប្លែងខ្លួន Delta គឺមានខ្ពស់ជាងវីរុសបំប្លែងខ្លួនអង់គ្លេស “Alpha” ដល់ទៅ ៤៦ភាគរយឯណោះ។

ការរកឃើញនេះ គឺផ្អែកទៅលើការវិភាគពិតៗ អំឡុងរលកទីបីនៅក្នុងប្រទេសអង់គ្លេស ហើយបានពិនិត្យមើលទៅលើ ករណីវីរុសបំប្លែងខ្លួន Delta ប្រមាណ ៨០,០០០ ករណី។

ប៉ុន្តែ ទោះបីជាមានការកើនឡើងនៃហានិភ័យ ដែលបង្កឡើងដោយវីរុសបំប្លែងខ្លួនក៏ដោយ ក៏ចំនួនជនជាតិអង់គ្លេសដែលឆ្លងរោគជាថ្មី នៅតែមានកម្រិតទាបនៅឡើយ។

ក្នុងចំណោមករណីវីរុសបំប្លែងខ្លួន Delta ដែល PHE ធ្វើការវិភាគក្នុងរយៈពេល ៣ ខែកន្លងមកនេះ មានតែ ១,២ ភាគរយប៉ុណ្ណោះ ដែលត្រូវបានគេកំណត់ថា នៅតែឆ្លងរោគទោះជាសះស្បើយ។

លទ្ធផលនេះត្រូវបានបង្ហាញបន្ទាប់ពីការសិក្សាមន្ទីរពិសោធន៍មួយកាលពីដើមខែនេះ ដែលបានរកឃើញថា វីរុសបំប្លែងខ្លួន Delta អាចចៀសផុតអង់ទីគ័រ របស់អ្នកឆ្លងវីរុសបំប្លែងខ្លួន ផ្សេងទៀត។

PHE បានពិនិត្យមើលលទ្ធផលនៃការធ្វើតេស្ត PCR សម្រាប់ក្រុមមនុស្ស ទាំងចាក់វ៉ាក់សាំងនិងមិនចាក់វ៉ាក់សាំង ដែលបានធ្វើតេស្តវិជ្ជមានកូវីដ យ៉ាងហោចណាស់ ៩០ ថ្ងៃមុននេះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ៥ វិធី ជួយការពារ អ្នកមិនទាន់ចាក់វ៉ាក់សាំង មិនឲ្យឆ្លង វីរុសបំប្លែងខ្លួន Delta