ព័ត៌មានអន្ដរជាតិ

កម្លាំងអាមេរិកចាប់ដកចេញ ជនស៊ីវិលអាហ្វហ្គានីស្ថានស្លាប់កាន់តែច្រើន

បានផុស

៤ years មុន

នៅ

ថ្ងៃចន្ទ ២៦ កក្កដា ២០២១

ដោយ

តួលេខជនស៊ីវិលត្រូវបានសម្លាប់ និងរបួសកាន់តែច្រើននៅក្នុងប្រទេសអាហ្វហ្គានីស្ថានពីការប្រឈមមុខផ្ទុះអាវុធដាក់គ្នាគិតចាប់ពីថ្ងៃទី១ ខែឧសភា នៅពេលកម្លាំងទ័ពអន្តរជាតិចាប់ផ្តើមដកចេញ ហើយពួកតាលីបង់ចាប់ផ្តើមវាយលុកកាន់តែខ្លាំង។

យោងតាមអង្គការសហប្រជាជាតិបានឲ្យដឹងថា រហូតដល់ពេលនេះ តួលេខស្លាប់ច្រើនកើតមាននៅសមរភូមិប្រយុទ្ធក្នុងតំបន់ជនបទ។ របាយការណ៍ការការពារជនស៊ីវិលក្នុងជម្លោះប្រដាល់អាវុធនិយាយថា ប្រសិនបើជម្លោះត្រូវបានផ្ទុះឡើងនៅទីក្រុង ឬទីប្រជុំដែលមានមនុស្សច្រើន ផលវិបាកកាន់តែអាក្រក់។

អាហ្វហ្គានីស្ថានបានធ្លាក់ទៅក្នុងវិបត្តិបះបោរចាប់តាំងពីពួកគេបានចាប់ផ្តើមការវាយលុកកាលពីពីរខែមុន ស្របពេលនឹងកាលបរិច្ឆេទកំណត់នៃការដកកម្លាំងទ័ពរបស់សហរដ្ឋអាមេរិក និងកម្លាំងសម្ព័ន្ធមិត្តផ្សេងទៀត។ របាយការណ៍អង្គការសហប្រជាជាតិគណនាទូទាំងប្រទេសនៃជនស៊ីវិលដែលទទួលរងផលប៉ះពាល់ពីការប្រយុទ្ធគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បានកត់សំគាល់ថា កម្រិតនៃការស្លាប់ជិតជាប់កំណត់ត្រាក្នុងពេល៦ខែដំបូងឆ្នាំនេះ ជាមួយក្រុមបះបោរដែលទទួលខុសត្រូវសម្រាប់ជាងពាក់កណ្តាលនៃការស្លាប់ និងរបួស។ របាយការណ៍និយាយថា ការកើនឡើងយ៉ាងខ្លាំងក្នុងរយៈពេលពីរខែចាប់តាំងពីថ្ងៃទី១ ខែឧសភាដែលបានក្លាយជាកង្វល់ដ៏ធ្ងន់ធ្ងរ។

ក្នុងរយៈពេលនេះ ជនស៊ីវិល៧៨៣នាក់ត្រូវបានសម្លាប់ និង១៦០៩នាក់របួស ដែលស្ទើរតែស្មើនឹងចំនួនកាលពី៤ខែដំបូងក្នុងឆ្នាំនេះ ហើយតួលេខខ្ពស់បំផុតគឺនៅខែឧសភា និងមិថុនា ចាប់តាំងពីអង្គការសហប្រជាជាតិចាប់ផ្តើមកត់ត្រាក្នុងឆ្នាំ២០០៩។ ពួកគេក៏ទំនងជាអាក្រក់បំផុតដែរ ចាប់តាំងពីតាលីបង់ត្រូវបានផ្តួលរំលំអំណាចកាលពីឆ្នាំ២០០១។

លោក Deborah Lyons តំណាងពិសេសរបស់លោកអគ្គលេខាធិការអង្គការសហប្រជាជាតិប្រចាំអាហ្វហ្គានីស្ថានបាននិយាយ ៖«ខ្ញុំសូមអង្វរដល់មេដឹកនាំតាលីបង់ និងអាហ្វហ្គានីស្ថានឲ្យយកចិត្តទុកដាក់លើផ្លូវនៃការប៉ះទង្គិចគ្នា ហើយការប៉ះទង្គិចបានធ្វើឲ្យមហន្តរាយដល់ជនស៊ីវិល»។

លោកថា ៖«របាយការណ៍បង្ហាញពីការព្រមានយ៉ាងច្បាស់ក្រឡែតថា ចំនួនជនស៊ីវិលអាហ្វហ្គានីស្ថានមិនធ្លាប់មានពីមុនបានត្រូវបានវិនាសនៅឆ្នាំនេះ ប្រសិនបើហិង្សាកំពុងកើនឡើងមិនឈប់ទេនោះ»៕

ប្រែសម្រួល៖ វីរបុត្រ
ប្រភព៖ theguardian

Related Topics:ប្រទេសអាហ្វហ្គានីស្ថាន