ចាប់ខ្លួនមេសន្តិសុខប្រធានាធិបតីហៃទី ពាក់ព័ន្ធការធ្វើឃាត

កាលពីថ្ងៃចន្ទទី ២៦ ខែកក្កដា ប៉ូលិសហៃទី បានចាប់ខ្លួនមេសន្តិសុខរបស់លោក Jovenel Moise ដែលជាផ្នែកមួយនៃការស៊ើបអង្កេត កំពុងបន្តលើការធ្វើឃាតប្រធានាធិបតីកាលពីថ្ងៃទី ៧ ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសន្តិសុខលោក Jean Laguel Civil ត្រូវបានគេសង្ស័យថា ជាប់ពាក់ព័ន្ធនឹងផែនការដែលលោក Moise ត្រូវបានសម្លាប់នៅក្នុងផ្ទះរបស់គាត់ទាំងកណ្តាលអធ្រាត្រ។ លោកប្រធានាធិបតីត្រូវបានសម្លាប់ ដោយកងកុម្ម៉ង់ដូប្រដាប់អាវុធ ដែលបានឆ្លងកាត់ឆ្មាំប្រធានាធិបតីដោយគ្មានការបាញ់ស្កាត់សូម្បីមួយគ្រាប់។

លោក Civil ត្រូវបានគេឃុំឃាំងរួចទៅហើយនៅឯពន្ធនាគារមួយក្នុងតំបន់ Delmas ក្បែររដ្ឋធានី Port-au-Prince។

ស្របពេលជាមួយគ្នានោះ ស្នងការក្រុង Port-au-Prince លោក Bed-ford Claude បានបញ្ជាអាជ្ញាធរអន្ដោប្រវេសន៍ ឲ្យហាមឃាត់មន្ដ្រីប៉ូលិសចំនួនបួននាក់ ដែលទទួលខុសត្រូវចំពោះសន្តិសុខរបស់លោក Moise កុំឲ្យចាកចេញពីប្រទេស។

កាលពីថ្ងៃចន្ទ ប៉ូលិសក៏បានចេញដីកាចាប់ខ្លួនលោក Wendell Coq Thelot ចៅក្រមតុលាការជាន់ខ្ពស់ ដែលត្រូវបានបណ្តេញចេញពីតំណែងដោយលោក Moise ផងដែរ។

ព័ត៌មានលម្អិតនៃការធ្វើឃាតនេះ នៅតែមិនទាន់ច្បាស់ ប៉ុន្តែនាយករដ្ឋមន្រ្តីទើបឡើងកាន់តំណែងលោក Ariel Henry បានសន្យាថា នឹងនាំឃាតកសម្លាប់លោក Moise មកកាត់ទោសឲ្យទាល់តែបាន។

គួរបញ្ជាក់ថា ប៉ូលិសបានចាប់ខ្លួនទាហានស៊ីឈ្នួលកូឡុំប៊ីប្រមាណ ២០ នាក់ ដែលជាផ្នែកមួយនៃផែនការ ដែលពួកគេនិយាយថា ត្រូវបានរៀបចំឡើងដោយក្រុមហៃទី មានទំនាក់ទំនងនៅបរទេស៕

ប្រែសម្រួល៖ Vann Vann

ប្រភព៖ CNA

ចុចអាន៖ ហៃទី ចាប់បានជនសង្ស័យ ជាមេខ្លោងធ្វើឃាតប្រធានាធិបតី បន្ទាប់ពីជិះយន្តហោះចូលប្រទេស ប៉ងឡើងកាន់តំណែង