លោក គីម ជុងអ៊ុន ថា អ្នកដឹកនាំប្រទេសក្នុងសង្គ្រាមទសវត្សឆ្នាំ ១៩៥០ ជាគ្រូត្រូវរៀនសូត្រតាម

ទីភ្នាក់ងារព័ត៌មានផ្លូវការ KCNA បានរាយការណ៍នៅថ្ងៃពុធនេះថា អតីតយុទ្ធជននៃសង្គ្រាមកូរ៉េ បានប្រមូលផ្តុំគ្នាសម្រាប់សន្និសីទជាតិលើកទី ៧ នៃអតីតយុទ្ធជនសង្គ្រាម ក្នុងឱកាសខួបលើកទី ៦៨ នៃការបញ្ចប់សង្គ្រាមនៅរដ្ឋធានីព្យុងយ៉ាងរបស់កូរ៉េខាងជើង កាលយប់ថ្ងៃអង្គារ ។

នៅក្នុងសុន្ទរកថានៅឯសន្និសីទនោះ មេដឹកនាំកំពូលរបស់កូរ៉េខាងជើងលោក គីម ជុងអ៊ុន បានកោតសរសើរដល់អ្នកការពារ និងអ្នកកសាងប្រទេសក្នុងទសវត្សឆ្នាំ ១៩៥០ ដែលបានបង្កើតស្មារតីប្រយុទ្ធ ក៏ដូចជាវីរភាពជាវីរជន និងជាគ្រូពិតប្រាកដដែលយើងគួរកោតសរសើរ និងរៀនសូត្រ ហើយលោកសូមដឹងគុណជារៀងរហូត ។

លោកបាននិយាយថា នេះជាបេសកកម្មកិត្តិយសរបស់កូនចៅ នៃអតីតយុទ្ធជនក្នុងការពង្រឹង និងនាំមកនូវវិបុលភាពដល់ប្រទេស ។

លោកក៏បានសម្តែងនូវការជឿជាក់ផងដែរថា ស្មារតីដ៏អស្ចារ្យនេះ នឹងជាកម្លាំងជំរុញគ្មានថ្ងៃបញ្ចប់ ក៏ដូចជាជំរុញការជឿនលឿន និងការអភិវឌ្ឍនៃសំណង់សង្គមនិយមរបស់យើង ។

គួររំឭកថា សង្គ្រាមកូរ៉េបានផ្ទុះឡើងនៅថ្ងៃទី ២៥ ខែមិថុនា ឆ្នាំ ១៩៥០ និងបញ្ចប់ដោយការចុះហត្ថលេខាលើកិច្ចព្រមព្រៀងឈប់បាញ់នៅថ្ងៃទី ២៧ ខែកក្កដា ឆ្នាំ ១៩៥៣ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ទីបំផុត កូរ៉េទាំងពីរ ស្ដារទំនាក់ទំនងឆ្លងកាត់ព្រំដែនឡើងវិញ ក្រោយ ក្រុងព្យុងយ៉ាង កាត់ផ្ដាច់កាលឆ្នាំមុន