កាន់តែធ្ងន់ធ្ងរ! ថៃ ព្យាករ មានអ្នកឆ្លងកូវីដជាង ៤ម៉ឺនករណីនិងស្លាប់ ៥០០នាក់ ក្នុងមួយថ្ងៃ

ប្រទេសថៃ អាចនឹងមានអ្នកឆ្លងជំងឺកូវីដ-១៩ថ្មី ជាង ៤ ម៉ឺនករណីនិងស្លាប់ចំនួន ៥០០ នាក់ក្នុងមួយថ្ងៃ នៅពាក់កណ្តាលខែកញ្ញា ប្រសិនបើវិធានការបិទខ្ទប់នាពេលបច្ចុប្បន្ន មិនត្រូវបានអនុវត្តឲ្យបានខ្ជាប់ខ្ជួន និងគ្មានការសហការពេញលេញពីមនុស្សគ្រប់រូបទេនោះ។ នេះបើយោងតាមការព្យាកររបស់ក្រសួងសុខាភិបាល។

ទីប្រឹក្សានិងជាអ្នកនាំពាក្យក្រសួង លោកវេជ្ជបណ្ឌិត Rungruang Kitpati បាននិយាយថា មានតែការអនុវត្តវិធានការគ្រប់គ្រងឲ្យបានតឹងរ៉ឹង និងកិច្ចសហប្រតិបត្តិការរួមរបស់អ្នករាល់គ្នាប៉ុណ្ណោះ ដែលនឹងធ្វើឲ្យអត្រាឆ្លងនិងស្លាប់ថយចុះ។

ជីវិតកាន់តែច្រើនអាចសង្រ្គោះបាន ហើយមនុស្សកាន់តែតិចនឹងឆ្លង ប្រសិនបើមានវិធានការតឹងរ៉ឹងនិងអនុវត្តឲ្យបានហ្មត់ចត់ អមដោយការពន្លឿនការត្រួតពិនិត្យនិងចាក់វ៉ាក់សាំង។

ខណៈការផ្ទុះឡើងជាថ្មីនៃជំងឺកូវីដ-១៩ ត្រូវបានរាយការណ៍នៅក្នុងប្រទេសមួយចំនួននោះ ​លោកបាននិយាយថា ការរឹតត្បិតដើម្បីទប់ស្កាត់ការរីករាលដាលនៃការឆ្លង ត្រូវតែរឹតបន្តឹង។

លោកបានបង្ហាញថា នៅទីក្រុងបាងកក ប្រជាជន ៦១,៦៧ភាគរយ និងមនុស្សចាស់ ៧០ភាគរយ បានទទួលការចាក់វ៉ាក់សាំងហើយ នៅខែសីហា វ៉ាក់សាំងចំនួន១០លានដូសទៀត នឹងមកដល់ ហើយប្រជាជននៅតាមបណ្តាខេត្តផ្សេងទៀតនឹងទទួលបានវ៉ាក់សាំងបន្ថែម៕

ប្រែសម្រួល៖ Vann Vann

ប្រភព៖ Thai PBS

ចុចអាន៖ ស្លាប់ច្រើនពេក ថៃ ចាប់ផ្តើមរក្សាទុកសពនៅក្នុង កុងតឺន័រក្លាស្សេ