កុំបារម្ភ! ការចាក់វ៉ាក់សាំងលាយគ្នា បង្កើតប្រព័ន្ធភាពស៊ាំខ្លាំងក្លាប្រឆាំង វីរុស

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃអាទិត្យទី ០១ ខែសីហា បានប្រកាសសម្រេចឲ្យចាក់វ៉ាក់សាំង ដូសទី៣ ទៅលើប្រជាជនកម្ពុជា ដោយយកវ៉ាក់សាំង AstraZeneca ជាដូសជំរុញ។

សម្ដេចតេជោបានបញ្ជាក់ថា សម្រាប់ប្រជាជន ដែលចាក់វ៉ាក់សាំង ប្រភេទ Sinopharm និង Sinovac រួចហើយ ត្រូវចាក់ AstraZeneca ជាដូសទី៣។

ងាកទៅប្រទេសអង់គ្លេសឯណោះវិញ ការសាកល្បង Com-COV របស់សាកលវិទ្យាល័យ Oxford ដែលពាក់ព័ន្ធនឹងអ្នកស្ម័គ្រចិត្តជាង ៨០០ នាក់ បានធ្វើការពិនិត្យប្រសិទ្ធភាពនៃវ៉ាក់សាំង AstraZeneca និង Pfizer ចំនួន២ដូស ឬចាក់លាយគ្នា មួយប្រភេទមួយដូស។

យោងតាមលទ្ធផល ការចាក់វ៉ាក់សាំង Pfizer លាយជាមួយ AstraZeneca បានបង្កើតការឆ្លើយតបនៃប្រព័ន្ធភាពស៊ាំយ៉ាងខ្លាំងក្លាប្រឆាំងនឹងវីរុស។

លទ្ធផលនៃការស្រាវជ្រាវបានបង្ហាញថា លំដាប់លំដោយនៃការចាក់វ៉ាក់សាំង បានបញ្ចេញភាពខុសគ្នា ដោយការចាក់ AstraZeneca មុន Pfizer បានបង្កឲ្យមានអង់ទីគ័រនិងការឆ្លើយតបរបស់កោសិកា T-cell ខ្ពស់ជាងការចាក់ Pfizer មុន AstraZeneca។

កោសិកា T-cell បានជំរុញការផលិតអង់ទីគ័រនិងជួយប្រយុទ្ធប្រឆាំងនឹងកោសិកាដែលឆ្លងមេរោគ។

ដោយឡែក កាលពីខែឧសភា ការសិក្សារបស់អេស្ប៉ាញ ដែលមានការចូលរួមពីអ្នកស្ម័គ្រចិត្តជាង ៦០០ នាក់បានរកឃើញថា ការចាក់វ៉ាក់សាំង AstraZeneca មុន Pfizer មានប្រសិទ្ធភាពជាងការចាក់ AstraZeneca ចំនួន២ដូស៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ សម្ដេចតេជោ សម្រេចឱ្យចាក់​ដូស​​ទី៣ យកវ៉ាក់សាំង​AstraZenica ទៅចាក់