អ្នកជំនាញអះអាងថា មេរោគស្រដៀងនឹងវីរុស SARS-CoV-2 មានតាំងពីឆ្នាំនេះមកម្ល៉េះ

លោក Didier Pittet អ្នកជំនាញខាងជំងឺឆ្លងនៅមន្ទីរពេទ្យសាកលវិទ្យាល័យហ្សឺណែវ និងជាអ្នកបង្កើតទឹកអនាម័យលាងដៃបានប្រាប់សារព័ត៌មាន Sputnik នៅក្នុងបទសម្ភាសន៍មួយថា មេរោគដែលស្រដៀងទៅនឹងវីរុស SARS-CoV-2 អាចមានតាំងពីឆ្នាំ ២០១៣ មកម្ល៉េះ ។

លោក Pittet ថា “ឆ្នាំ ២០១៣ នៅក្នុងប្រទេសចិន ចម្ងាយប្រហែល ១,១០០ គីឡូម៉ែត្រពីទីក្រុងអ៊ូហាន នៅក្នុងរូងភ្នំដែលអ្នកជំនាញខាងវិទូកំពុងស្រាវជ្រាវ បានរកឃើញវីរុសដែលមានលក្ខណៈប្រហាក់ប្រហែលនឹងជំងឺកូវីដ ៩៦ ភាគរយ ហើយវាអាចត្រូវបានចម្លងទៅមនុស្ស ដែលកំពុងធ្វើការក្នុងរូងនោះ” ។

អ្នកជំនាញបានបន្តថា នេះមិនមែនមានន័យថា វីរុសត្រូវបានបង្កើតឡើងដោយសិប្បនិម្មិតនោះទេ ប៉ុន្តែវាអាចមានន័យថា វីរុសនេះស្រដៀងទៅនឹងវីរុស SARS-CoV-2 ត្រូវបានរកឃើញនៅឆ្នាំ ២០១៣ ហើយការពិតនេះត្រូវបានលាក់បាំង ។

លោកបានបន្តថា “ហើយវាបានក្លាយជាជំងឺរាតត្បាត និងសាយភាយនៅក្នុងធម្មជាតិមួយរយៈ ។ មានភស្តុតាងបញ្ជាក់ថា ប្រជាជននៅទ្វីបអឺរ៉ុ បនិងអាស៊ីឆ្លងជំងឺកូវីដ ១៩ មុនពេលវីរុសនេះត្រូវបានគេស្គាល់ទូទាំងពិភពលោក” ។

គួរបញ្ជាក់ថា អង្គការសុខភាពពិភពលោក (WHO) បានប្រកាសពីជំងឺរាតត្បាតកូវីដ ១៩ នៅខែមីនា ឆ្នាំ ២០២០ ហើយរហូតមកដល់ពេលនេះ មនុស្សជិត ២០០ លាននាក់បានឆ្លង និងជាង ៤ លាននាក់នៅទូទាំងពិភពលោកបានស្លាប់ ដោយសារវីរុសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ WHO ថា វីរុសបំប្លែងខ្លួនឥណ្ឌា នឹងគ្រប់គ្រងពិភពលោកក្នុងរយៈពេលប៉ុន្មានខែខាងមុខនេះ