គ្រាន់តែមួយខេត្ត ថៃ មានគ្រូពេទ្យជួរមុខដល់ទៅជាង ៣០០នាក់ ឆ្លងកូវីដ 

បុគ្គលិកពេទ្យជាង ៣០០ នាក់នៅទូទាំងស្រុកចំនួន ៣ ក្នុងខេត្តសាមុតសាខន ប្រទេសថៃ បានឆ្លងជំងឺកូវីដ-១៩។ នេះបើតាមការឲ្យដឹងពីអភិបាលខេត្តលោក​ Veerasak Vichitsangsri។

លោកអភិបាលបានផ្តល់តួលេខនេះ នៅលើទំព័រ Facebook របស់លោកកាលពីម្សិលមិញដោយនិយាយថា ខេត្តបានចែកចាយកញ្ចប់ជំនួយសង្គ្រោះ ដល់គ្រូពេទ្យដែលឆ្លងរោគខណៈពេលកំពុងបំពេញការងារ។

ក្រុមគ្រូពេទ្យត្រូវបានដាក់ពង្រាយនៅទូទាំងស្រុក Muang, Ban Phaeo និង Krathum Baen។

លោកអភិបាលខេត្ត ក៏បានអំពាវនាវដល់រដ្ឋាភិបាល ឲ្យចាក់វ៉ាក់សាំង Pfizer ដូសទី៣ ដល់ក្រុមគ្រូពេទ្យជួរមុខផងដែរ។ ដោយហៅពួកគេថាជាទ្រព្យដ៏សំខាន់បំផុត ក្នុងការប្រយុទ្ធប្រឆាំងនឹងជំងឺកូវីដ-១៩ លោក Veerasak បាននិយាយថា ក្រុមគ្រូពេទ្យសមនឹងទទួលបានការការពារដ៏ល្អបំផុត ដែលរដ្ឋាភិបាលអាចផ្តល់ជូន។

គួរបញ្ជាក់ថា នៅថ្ងៃចន្ទនេះ ប្រទេសថៃ បានរាយការណ៍អំពីអ្នកស្លាប់ដោយសារជំងឺកូវីដ-១៩ ចំនួន ១៧៨នាក់ និងឆ្លងថ្មី ១៧,៩៧០ករណីទៀត ធ្វើឲ្យអ្នកឆ្លងសរុបចាប់តាំងពីផ្ទុះរោគរាតត្បាតកើនដល់ ៦៣៣,២៨៤ករណី និងស្លាប់សរុប ៥,១៦៨នាក់៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ Delta ឆ្លងក្នុងសហគមន៍ហើយ! សង្កេតមើលដោយខ្លួនឯង រោគសញ្ញា កូវីដ ទាំង ៣ ប្រភេទ កំពុងវាយលុក កម្ពុជា