ទោះកូវីដកំពុងខ្លាំង សហរដ្ឋអាមេរិកត្រៀមកាត់បន្ថយរយៈពេលធ្វើចត្តាឡីស័ក ឆាប់ៗនេះ

មន្រ្តីជាន់ខ្ពស់មួយរូបបាននិយាយកាលពីថ្ងៃអង្គារទី២៤ខែវិច្ឆិកាថា មជ្ឍមណ្ឌលគ្រប់គ្រងនិងបង្ការជំងឺអាមេរិកអាចនឹងកាត់បន្ថយរយៈពេលនៃការធ្វើចត្តាឡីស័ក។

នាពេលបច្ចុប្បន្ននេះ អាជ្ញាធរសុខាភិបាលបានផ្តល់អនុសាសន៍ធ្វើចត្តាឡីស័ករយៈពេល១៤ថ្ងៃដើម្បីទប់ស្កាត់ការឆ្លងវីរុសកូរ៉ូណាប៉ុន្តែមន្ត្រីម្នាក់បាននិយាយកាលពីថ្ងៃអង្គារថា មានភ័ស្តុតាងដែលថារយៈពេលនេះអាចធ្វើឲ្យខ្លីបានប្រសិនបើអ្នកជំងឺត្រូវបានគេធ្វើតេស្តរកវីរុសក្នុងអំឡុងពេលនៃការធ្វើចត្តាឡីស័ក។

មន្ត្រីសុខាភិបាលកំពូលរបស់សហរដ្ឋអាមេរិកបាននិយាយកាលពីថ្ងៃអង្គារថា “ខ្ញុំសូមបញ្ជាក់ថា យើងកំពុងពិនិត្យមើលភ័ស្តុតាងជាប្រចាំហើយយើងកំពុងចាប់ផ្តើមបង្ហាញភ័ស្តុតាងថា ការធ្វើចត្តាឡីស័កកាន់តែឆាប់ដែលបំពេញបង្រ្គប់ដោយការធ្វើតេស្តអាចត្រូវបានកាត់បន្ថយពី១៤ថ្ងៃមកកាន់រយៈពេលមួយដែលខ្លីជាងនេះ”។

លោកបានបន្ថែមថា ការសម្រេចផ្លាស់ប្តូរគោលការណ៍ណែនាំនេះមិនមែនជាទីបញ្ចប់ទេហើយក្រុមអ្នកជំនាញនៅតែកំពុងពិនិត្យទិន្នន័យឡើងវិញដើម្បីធ្វើឲ្យប្រាកដថា ការផ្លាស់ប្តូរបែបនេះនឹងមិនធ្វើឲ្យមនុស្សមានគ្រោះថ្នាក់ឡើយ។

រដ្ឋាភិបាលសហរដ្ឋអាមេរិកបានរងការរិះគន់ពីក្រុមអ្នកជំនាញនិងមន្រ្តីសុខភាពសាធារណៈចំពោះភាពយឺតយ៉ាវក្នុងការបង្កើនការធ្វើតេស្តរកជំងឺកូវីដ១៩។

យោងតាមរបាយការណ៍របស់ Reuters បានឲ្យដឹងថា ករណីឆ្លងវីរុសថ្មីនៅសហរដ្ឋអាមេរិកមានអត្រាជាមធ្យមមានជិត១៧២,០០០នាក់ក្នុងមួយថ្ងៃហើយមានចំនួនលើស១០០,០០០នាក់ចាប់តាំងពីដើមខែវិច្ឆិកាមក។

ចំនួនអ្នកស្លាប់សរុបរបស់សហរដ្ឋអាមេរិកដោយសារជំងឺកូវីដ១៩បានឈានដល់ជិត២៥៩,០០០នាក់គិតត្រឹមថ្ងៃអង្គារខណៈករណីឆ្លងជាង១២.៥លានករណីត្រូវបានកត់ត្រា៕

ប្រែសម្រួលដោយ៖ Vann Vann

ប្រភព៖ Reuters