ប្រទេសធំៗនៅតែបន្តចាក់វ៉ាក់សាំងដូសទី៣ មិនខ្វល់ការអំពាវនាវរបស់ WHO

ប្រទេសអាល្លឺម៉ង់ បារាំងនិងអ៊ីស្រាអែល នឹងបន្តផែនការ ចាក់វ៉ាក់សាំងកូវីដ ដូសជំរុញ ដោយមិនអើពើនឹងការអំពាវនាវរបស់អង្គការសុខភាពពិភពលោក (WHO) ឲ្យផ្អាក រហូតដល់មនុស្សកាន់តែច្រើនត្រូវបានចាក់ថ្នាំបង្ការនៅជុំវិញពិភពលោកនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្ត បន្តចាក់វ៉ាក់សាំងដូសទី៣ បើទោះបីជាមានសេចក្តីថ្លែងការណ៍ដ៏ខ្លាំងក្លារបស់ WHO ក៏ដោយនេះ បានបង្ហាញពីភាពមិនស្មើគ្នាដ៏ធំធេង ក្នុងការឆ្លើយតបទៅនឹងជំងឺរាតត្បាត ខណៈបណ្តាប្រទេសអ្នកមាន កំពុងបង្កើនយុទ្ធនាការដើម្បីការពារប្រជាពលរដ្ឋពីវីរុសបំប្លែងខ្លួនឆ្លងខ្លាំង Delta។

ប្រធានាធិបតីបារាំងលោក Emmanuel Macron បាននិយាយថា ប្រទេសបារាំងកំពុងធ្វើការ លើការចាក់វ៉ាក់សាំងដូសទី ៣ ដល់មនុស្សចាស់ និងងាយរងគ្រោះចាប់ពីខែកញ្ញាទៅ។

ចំណែកក្រសួងសុខាភិបាលអាល្លឺម៉ង់បាននិយាយថា ប្រទេសនេះ មានបំណងចាក់វ៉ាក់សាំងដូសជំរុញ ដល់អ្នកជំងឺដែលមានប្រព័ន្ធការពារភាពស៊ាំចុះខ្សោយ មនុស្សចាស់និងអ្នកនៅតាមមណ្ឌលថែទាំ ចាប់ពីខែកញ្ញាទៅ។

ស្របពេលជាមួយគ្នានោះ នាយករដ្ឋមន្រ្តីអ៊ីស្រាអែលលោក Naftali Bennett បានជំរុញឲ្យប្រជាជនវ័យចំណាស់ ទៅទទួលវ៉ាក់សាំងដូសទី៣ បន្ទាប់ពីរដ្ឋាភិបាល ចាប់ផ្តើមយុទ្ធនាការចាក់ថ្នាំបង្ការដូសជំរុញកាលពីខែមុន។

កាលពីថ្ងៃពុធ ប្រធាន WHO លោក Tedros Adhanom Ghebreyesus បានអំពាវនាវឲ្យបញ្ឈប់ការចាក់វ៉ាក់សាំងដូសជំរុញ រហូតដល់យ៉ាងហោចណាស់ ចុងខែកញ្ញាដោយនិយាយថា វាមិនអាចទទួលយកបានទេសម្រាប់ប្រទេសអ្នកមាន ក្នុងការប្រើប្រាស់ការផ្គត់ផ្គង់វ៉ាក់សាំងសកលបន្ថែមទៀត៕

ប្រែសម្រួល៖ Vann Vann

ប្រភព៖ CNA

ចុចអាន៖ មេ WHO អំពាវ នាវ យ៉ាង ខ្លាំង ឲ្យ ផ្អាក ការ ចាក់វ៉ាក់ សាំង បង្ការ កូវីដ ដូស ទី ៣សិន